Cebu Grand Prix, Bert Enterprises daog dayon sa Donling Cup 2024
CEBU, Philippines — Mipabuto og makabungog nga 3-pointer si Rhojay Nemeño sa katapusang 48 segundos sa final period aron agakon ang Cebu Grand Prix sa kadaugan batok JLT Sorbeteros, 57-51 pagsugod sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.
Gumikan niini, si Nemeño ang napiling best player of the game ug topscorer sa duwa uban ang 15 puntos, upat ka rebounds ug pito ka assists. Human sa tres ni Nemeño wala na makaiskor ang JLT Sorbeteros hangtod nahilis ang oras. Si Roldan Daug miiskor sab og 15 puntos, samtang sila si Angelo Ponce ug Lucky Mendoza mitampo'g 11 ug 10 puntos sa Cebu Grand Prix ni Errol Mendoza.
Ang JLT Sorbeteros ni Jack Leonard Tagacanao gipangulohan nilang Romnick Romo ug Joshua Banaag nga parehong mikandos og 10 puntos. Sa unang aksyon, ang Bert Enterprises yano kaayong mikulit og daog pinaagi sa paglubong sa Bucket Blazers, 78-60 Si Eugene Rosaldo nga maoy best player ang nangu sa Bert Enterprises sa iyang 15 points, 10 rebounds ug 3 assists.
Sila si Darwin Nara, Francis Bauntad ug Rieljay Jabonita mihimo sab og double digits sa Bert Enterprises ni team manager Gilbert Sabal.
Nangu sa Bucket Blazers ni Chyrus Blen mao si Bernie Brylle Daño sa iyang 23 puntos, gisundan ni Jumel Batal nga dunay 10 puntos.
Ang Donling Cup giorganisar sa Brothers Ball League ubos sa liderato ni Marvin Sillar.
- Latest
