Celtics mi-sweep sa Pacers, abante sa NBA Finals
CEBU, Philippines — Gisilyohan sa Boston Celtics ang impresibo nilang 4-0 sweep sa Indiana Pacers uban ang 105-102 nga kadaogan kagahapon didto sa Gainbridge Fieldhouse sa Indianapolis, Indiana.
Gawas nga milangkat sa korona sa Eastern Conference, ang Celtics mi-abante sab sa NBA Finals diin silang sangkaon ang Dallas Mavericks o ang Minnesota Timberwolves.
Si Jaylen Brown mao na sab ang bida sa Celtics.
Mipasud siya og krusyal nga itsa nga nakatabla sa iskor, 102-102, sa nahibilin nga 2:40 sa duwa ug dayon gibaraw ang itsa ni Andrew Nembhard.
Sa pinal nga 45 segundos, si Brown milabay og maanindot kaayong pasa ngadto ni Derrick White, nga miposa sab dayon sa iyang 3-pointer nga maoy nagtuldol sa kulbahinam nga daog sa Celtics.
Duna pa untay tsansa ang Pacers nga makapuwersa og overtime apan nasipyat ang gitira nga tres ni Nembhard sa hilimatyong segundos.
Si Brown mipupo og 29 puntos, samtang si Jayson Tatum miharos og 26 puntos, 13 ka rebounds ug walo ka assists alang sa Celtics nga mobalik sa NBA Finals duha ka tuig human sila gipilde sa Golden State Warriors.
Ang Celtics katapusang nakampiyon niadto pang 2008.
- Latest