Nagkadaiyang sports events midugang og kasadya sa Hudyaka ZaNorte 2024

CEBU, Philippines — Nagkadaiyang mga kalihukan sa paugnat sa kusog ang nakahatag og dugang kahayag ug kasadya sa bonggang kasaulogan sa Hudyaka ZaNorte Festival 2024 didto sa Zamboanga del Norte.   

Gisugdan og chess, badminton, motocross, ug drag race competition, ang mga organizers mipasiugda sab og tulo ka adlaw nga volleyball clinic, nga mahuman karong adlawa (Huybes, Mayo 30), nga gipadagan sa mga varsity players gikan sa Adamson University Falcons sa University Athletic Association of the Philippines (UAAP).

Ang mga katawhan sa ZaNorte angayan nga mangandam sa ilang kaugalingon sa mas kulbahinam ug maanindot nga kalingawan karong  weekend diin walo ka mga torneyo ang nakahan-ay.

Karong Sabado, Hunyo 1, mosikad sa serye sa mga aksiyon ang Hudyaka Half-Marathon Challenge didto sa Capitol Plaza sa Dipolog City, hinampakay sa volleyball didto sa Sta. Isabel court, ug ang golf didto sa world-class Dakak Golf Club sa siyudad sa Dapitan.

Ang usa ka adlaw nga kumbati naglangkob sab og 8-a-side football festival, Bancarera boat race didto sa Sunset Boulevard sa Dapitan, Philippine Practical Shooting Association (PPSA) Level 2 shootfest, darts showdown sa Estaka Central School, ug hip-hop dance contest.   

Sa adlawng Dominggo (Hunyo 2), ang Kapadyak Mindanao Mountain Bike Challenge banatan didto sa ZaNorte Sports Complex sa Dipolog nga pagasundan sa pagpadayon sa ubang mga duwa. Ang duha ka semanang aktibidades kabahin sa selebrasyon sa ika-72 nga founding anniversary sa probinsiya sa Zamboanga del Norte ubos sa liderato ni Gobernador Rosalina "Nanay Nene" Jalosjos.