National Age-Group Chess Championships  kasado na sa Dumaguete

CEBU, Philippines — Andam na ang tanan alang sa FIDE-rated National Age-Group Chess Championships 2024 nga mosikad karon nang Biyernes, Mayo 31, didto sa Oriental Convention Center sa dakbayan sa Dumaguete.

Gipaluyohan ni Negros Oriental Governor Manuel “Chaco” Sagarbarria ug giorganisa sa National Chess Federation of the Philippines (NCFP), ang usa ka semanang pinug-anay sa utok matapos karong Hunyo 6.

Pagasalmotan kini og dili mominus sa 500 ka mga magduduwa og ahedres, nga maoy labing daghan sa 24 ka tuig nga kasaysayan sa tinuig nga torneyo.

Ang mga entrante naglaraw og luna sa National Championships nga gikatakda karong Hunyo 22-30 didto sa Dapitan City Cultural Center sa Zamboanga del Norte.

Ang Top 8 sa matag dibisyon, nga mao ang boys' Under 18, U16, U14 ug U12 ug girls’ U18, U16, U14 ug U12, mo-abante sa grand finals diin ang mga nananaog dunay tsansa nga makapakita'g aksiyon sa mga internasyonal nga kompetisyon.

“Our hope is to produce future Grandmasters,” matud pa ni NCFP Chief Executive Officer Grandmaster Jayson Gonzales. Gipaabot nga motambong sa maong kalihukan si GM Eugene Torre, ang labing unang GM sa Asya, aron pagdasig sa mga kabatan-onan nga kab-oton ang ilang mga damgo sa kinabuhi pinaagi sa chess.

Gawas nilang Sagarbarria ug Torre, sila si NCFP Chairman/President Butch Pichay ug Negros Oriental Congressman Manuel Sagarbarria motunga sab sa seremonyas sa pagbukas.