Piala madasigon nga manulong sa Japan WBO Asia Pacific featherweight title ang tirada

CEBU, Philippines — Ang pambato sa ARQ Stable nga si Rodex “The Tank” Piala nasayud nga usa ka malisud nga tahas ang nag-atang kaniya sa unahan sa iyang pag-away alang sa usa ka titulo sa labing unang higayon didto sa teritoryo sa iyang kontra sa una niyang away gawas sa nasud.

Apan si Piala misaad nga buhaton ang tanan kutob sa iyang mahimo aron molampus batok sa Hapon nga si si Kenji Fujita sa kulbahinam nga sangka tali sa duha ka way pildeng mga boksidor alang sa korona sa World Boxing Organization (WBO) Asia Pacific featherweight division sa pasundayag nga gipasiugdahan sa Teiken Promotions karong Sabado, Hunyo 1, didto sa makasaysayanong Korakuen Hall sa Tokyo, Japan.

"Kining boxing akoang kinabuhi. Sa matag training nako, naa pirme sa akong huna-huna ang akong pamilya," matud pa ni Piala. "Ako gyud gipangandaman og maayo kining awaya kay gusto sab nako nga dunay ikapasigarbo sa akong ARQ boxing team."

Si Piala nagbitbit og perpektong 10-0 rekord uban ang usa pa lamang ka knockout, samtang si Fujita wa say pilde sa unom ka away uban ang 3KOs.

Wala gibati bisan og gamay nga presyur, ang 29-anyos nga si Piala naglantaw sa unahan nga mowadwad sa iyang abilidad sa langyawng lapyahan sa unang higayon uban ang tumang kadasig.

"Excited ko dili about sa pagbiyahe. Na-excited ko sa akoang sumbagay sa lugar kon asa ko maabot," padayong pa niya.

Si Piala miangkon nga mabug-at nga misyon ang iyang pas-anon apan andam siyang makigpatay sa tinguha nga bitbiton ang gihandum niyang bakos sa iyang pagbalik dinhi sa nasud.

    "Mapasalamaton kaayo ko kay tanan suporta gihatag nako sa akoang manager nga si sir Jason Arqusiola ug mam Eva Mari. Mao nang maningkamot sab ko og maayo ug buhaton tanan kutob sa akong mahimo inubanan og pag-ampo nga makuha nako ang championship sa WBO Asia Pacific," dason pa ni Piala.