Paco overall champ sa FCAAF

MANILA, Philippines – Nasungkit ng Paco Citizen Academy Foundation ang overall title sa 21st Filipino Chinese Amateur Athletic Federation (FCAAF) Inter-Scholastics Table Tennis Championship na ginanap sa Robinson's Otis sa Paco, Manila.

Winalis ng Paco ang apat na individual events habang nakasungkit din ito ng korona sa tatlong team events.

Nanguna sa kampanya ng Paco si Khevin Cruz, kapatid ni Keith Rhynn Cruz na nagwagi kamakailan sa Under-19 class ng World Table Tennis Youth Contender Championship sa Palawan.

Wagi ang World Youth silver medalist na si Khevin ng ginto matapos igupo si Jahrzali Rivera sa all-Paco finals ng boys' singles elementary class. 

Humirit pa ng isang ginto si Khevin nang tulungan nito ang Paco para makopo ang korona sa boys’ elementary team event kasama sina Qeshaun Lau Crisostomo, Jharzali Rivera at Efraim Jan Lau.

“The tournament is part of the FCAAF celebration for its 35th founding anniversary. For over three decades, we established a strong grassroots sports program through promotions, event organizing, and assistance not just for table tennis but for other 17 sports disciplines under the FCAAF supervision," ani PCAAF President Natalie Sia.

Kasama ni Sia sa awarding sina TATAND Honorary Presidents Charlie Lim, Wilson Tan at Joey Sy.

Nakahirit din ng ginto sina Paco bets Cayl Brent Chavez, Marcus Jnash Chavez at Jairus Rae Angeles sa boys’ boys high school team event gayundin sina Marioni Chime Caoile, Kristen Ashley Allorder, Adelyn Kate Allorder, at Gytha Sofia Adelaine Valdez sa girls' high school team event.

Nakaginto rin si Cayl Brent Chavez na nanalo kay Marcus Jnash Chavez sa boys' singles high school finals gayundin si Marioni Chime Caoile na nanaig kay Adelyn Kate Allorde para sa girls' singles high school crown.

Namayagpag sa girls' singles elementary si Myzette Riane Torres na nanalo kay Lyanne Victoria Gacias sa finals.