Donling ug JMD mag-abot na sab sa finals

CEBU, Philippines —  Magkuros na sab ang dalan sa mortal nga kaaway Donling Aircon Refrigeration Services ug JMD Automotive sa finals, apan ning higayona sa Ranny Colansi Cup 2023.

Kini ang ikatulong sunod-sunod ka higayon nga mag-abot sa finals ang duha ka karibal. Una sa 1st Zynergia Cup diin ang JMD maoy kampiyon, ikaduha sa Javier Ceramics Cup 2023 nga giharian sa Donling.

Unang nipasilong sa finals niadtong Domingo ang Donling dihang ilang gikulban og kaldero ang JSV Cuisine, 63-55 ubos sa pagpangulo sa best player niining si Kenn Rolf Nunez, kinsa mikabkab og 18 puntos, pito ka rebounds ug walo ka assists.

Nagpuli-puli'g labaw ang duha ka kampo gikan sa sinugdanan ug niabot sa punto nagtabla ang iskor, 55-all. Nasiak ang panagtabla human nakapasud og 3-point si Nunez sa nahabiling 2:30 sa fourth quarter. Giinat pa sa Donling ang labaw ngadto sa 60-55 ug wala na makarekober pa ang JSV sukad niadto. Sila si Ace Despi ug Kenaz Balderas nitampo'g 12 ug 10 puntos matag usa sa Donling ni team manager Romeo Quilaton Jr.

Si Dan Cardenas ang nangu sa JSV nga miukay og 13 puntos, samtang sila si Charlee Ocanada, RJ Bautista ug Barcoso Jr. mikandos og 10 puntos matag usa.

Sa main game, ang JMD yano kaayo miabante sa finals dihang ilang gipahubas ang Gavens Water Refilling Station, 56-37.

Gipangulohan kini ni Alain Tarona nga mirehistro'g 10 puntos, siyam ka rebounds, upat ka assists ug upat sab ka blocks nga nakapahimo kaniya isip best player of the game. Diyes puntos sab ang giamot ni Jomarie Arupo alang sa JMD ni Gerald Dilao.

Si Pedro Villarosa ang nangulo sa mas gagmay'ng Gavens nga mikandos og 16 puntos. Ang Gavens ni Kevin Mamac ug JSV ni Jeremias Vestra moduwa na lang alang sa ikatulong dapit. Ang championship ning maong liga nga giorganisar sa Brothers Ball League ubos sa liderato ni Marvin Sillar himuon karong Domingo.