Pacquiao wanted sa mga ballers ng World Cup
MANILA, Philippines — Hindi basketball players kundi boxing legend ang laging hinahanap ng mga international players sa kanilang pananatili sa Pilipinas para sa 2023 FIBA World Cup.
At iyon ay walang iba kundi ang Pambansang Kamao na si Manny “Pacman” Pacquiao na bagama’t wala sa basketball court ay siyang laging bukambibig ng mga dayong ballers dito.
Pinakabago na rito si Karl-Anthony Towns ng Dominican Republic matapos niyang bisitahin si ‘Pacman’ sa mansion nito sa Makati.
“It’s fun. It’s great to meet a Filipino legend, boxing legend, sports legend. I’ve known Manny for a while. Being able to see him in the ring personally, being in training camp. It’s really fun to get to catch up. We haven’t seen each other in a while,” pahayag ni Towns ng Minnesota Timberwolves.
Ayon pa kay Towns, nabisita niya na rin si Pacquiao sa mga training camps at laban nito sa Amerika kabilang na ang paghahanda para sa laban noong 2021 kontra kay Errol Spence Jr. na pinalitan ni Yordenis Ugas dahil sa injury.
At sa kanilang muling pagkikita ni ‘Pacman’ ay tila lalong ginanahan si Towns nang magpakawala ng 24 points, 11 rebounds at 5 assists sa 87-82 upset win sa World No. 10 Italy.
Ito ay matapos siyang magposte ng 26 points at 10 rebounds sa 87-81 panalo ng Dominican Republic sa Gilas Pilipinas sa harap ng record-breaking World Cup gate attendance na 38,115 fans sa Philippine Arena sa Bocaue, Bulacan.
Bukod kay Towns, nauna nang sinabi ni Italy mentor Pozzecco ang paghanga niya sa natatanging 8-division world boxing champion pagkalapag pa lang ng Italians noong nakaraang linggo sa Pilipinas para sa World Cup.
- Latest
