GSI nakaikyas sa Cebu Locksmith sa Ranny Colansi Cup 2023
CEBU, Philippines — Nakasagunson og duha ka daog ang Gootsource Solution International (GSI) human naka-eskapo sa ligas nga duwa batok sa Cebu Locksmith, 59-58 sa nagpadayong Ranny Colansi Cup 2023 sa miaging gabii diha sa Ateneo de Cebu sa Mango Avenue, Cebu City.
Labaw kanunay ang GSI sa nag-unang tulo ka kuwarter, apan miaksyon og sikit ang Cebu Locksmith sa fourth period ug nahimong kulbaninam ang duwa dihang nagtabla ang iskor, 52-all sa nahabiling 4:32 segundos sa maong kuwarter.
Ang trayanggulo nilang Geory Apas, Ernie Inocencio ug VM Cempron nga pulos mitala og double figures maoy nangu sa rally sa GSI aron mabuak ang panagtabla ug responsabli sa kadaogan sa team ni Ivan Llesol.
Si Apas nga maoy best player of the game mirehistro'g 22 puntos, 10 rebounds ug 4 assists, si Inocencio miamot og 12 puntos, samtang si Cempron mitampo’g 10 puntos sa GSI nga duna na'y 2-2 win-loss record ning maong liga nga gipadagan sa Brothers Ball League ubos sa superbisyon ni Marvin Sillar.
Bugtong si Charlee Lumasag lang ang naka-double digits sa Cebu Locksmith sa iyang 16 puntos. Ang Cebu Locksmith ni Nestle Key Flores wala pa katilaw og daog sa upat nila ka duwa.
Sa sayo pa, si Kenn Rolf Nunez mihimo'g 14 puntos uban ang 6 ka rebounds ug lima ka assists aron pilion isip best player of the game.
Iyang gipangulohan ang Donling Aircon Refrigeration Services ni Romeo Quilaton Jr. nga mipilde sa Ate Jhesscan Mananahi (AJM) ni team owner Jessica Caneda sa iskor, 55-48. Si Jessie Sanchez miambit og 13 puntos alang sa 3-1 nga Donling.
Ang 2-2 nga AJM gipangulohan sab ni Brixter Villarias nga dunay 16 puntos, gisundan ni Kevin Caneda sa iyang 10 puntos.
- Latest
