Wolves buhi pa

CEBU, Philippines — Ang Minnesota Timberwolves naka-angkon pa og laing kibabuhi.

Salamat sa pagmangtas nilang Anthony Edwards ug Karl-Anthony Towns.

Si Edwards mipabuto og 29 puntos samtang si Towns milansang og tulo ka sagunson nga 3-pointers sa naghinapos nga bahin sa duwa sa dihang ang Timberwolves mitumba sa Dallas Mavericks, 105-100, sa Game 4 sa best-of-seven NBA Western Conference finals kagahapon didto sa American Airlines Center sa Dallas, Texas.

Labaw pa hinoon gihapon sa serye ang Mavs sa baraha nga 3-1 apan nadungagan ang kompiyansa sa Wolves sa ilang kaugalingon ilabi na kay sila maoy mo-host sa Game 5 karong Biyernes.

Gawas sa ekplosibong opensa ni Edwards, dalaygon sab si Towns nga mitali og 25 puntos apil niini ang tulo ka krusyal nga tres nga nakatabang sa Wolves pagposte og siyete puntos nga labaw, 98-92, sa pinal nga dos minutos sa aksiyon.

Giinat pa ni Edwards ang ilang labaw ngadto sa 100-92 sa nahibilin nga 1:47 sa duwa.

Ang Mavs nakasikit pa ngadto na lang sa tres puntos, 97-100, apan si Edwards mipasud sa maanindot niyang pull-up jumper sa gilay-on nga 21 ka tiil aron pagtuldok sa kulbahinam nga daog sa Wolves sa katapusang 40 segundos.

Sila si Mike Conley ug Rudy Gobert dako sab og naambag sa Wolves human nagkumboya og 27 puntos.

Ang Mavs nahagba bisan pa sa triple-double ni Luka Doncic nga mihipog og 28 puntos, 15 ka rebounds, ug 10 ka assists.