GSI daog na gyud sa Ranny Colansi Cup 2023
CEBU, Philippines — Solidong depensa ug ang nagpungasi nga mga puntos sa katapusang sayes minutos sa duwa maoy katapusang alas nga gibundak sa Gootsource Solution International (GSI) aron mabuntog ang CJL Sniper, 58-54 sa Ranny Colansi Cup 2023 sa miaging gabii diha sa Ateneo de Cebu sa Mango Avenue, Cebu City.
Labaw pirmi ang CJL gamit ang ilang 3-point shots, bisan pa niini ang GSI wala kawad-i og paglaum ug sa tanto nilang paningkamot nakatabla kini, 56-all sa katapusang sayes minutos sa fourth quarter. Sukad niadto wala na magkadimao ang duwa sa CJL human mipatuman og solidong depensa ang GSI.
Si Ernie Inocencio nga maoy topscorer sa GSI sa iyang 22 points, 7 rebounds ug 6 assists ang napiling best player of the game. Samtang si Geory Apas mitampo'g 10 puntos alang sa unang daog sa GSI ni Ivan Llesol.
Ang napildeng CJL Sniper ni James Lapinig gipangulohan ni Rondirk Monterola nga mikapkap og 18 puntos, gisundan ni Johnas Malubay nga dunay 10 puntos.
Ang GSI ug CJL parehong nagbitbit og managsamang 1-2 nga baraha ning maong liga nga giorganisar sa Brothers Ball League ubos sa superbisyon ni Marvin Sillar.
Sa main game, ang Donling Aircon Refrigeration Services mipukan sa Gavens Water Refilling Station sa iskor nga 69-64. Tulo ka Donling players ang miiskor og double figures pinangulohan ni Roldan Daug sa iyang game-high 27 puntos uban ang walo ka rebounds ug tulo ka assists nga nakapahimo kaniya isip best player of the game.
Si Angelo Ponce mitimbre'g 17 puntos ug si Ace Despi miamot og 10 puntos sa Donling ni Romeo Quilaton Jr. nga aduna na'y 2-1 win-loss record.
Tulo sab ka Gavens players ni Kevin Mamac ang mirehistro g double digits sa pagpangulo ni Pedro Villarosa sa iyang 16 puntos, gisundan ni Justine Sembrano ug Scott Alindajao nga adunay 11ug 10 puntos matag usa.
- Latest
