Angkols naghari sa LBA basketball tourney

CEBU, Philippines — Naglumpayat sa tumang kalipay ang Angkols human nasulod ang tres ni Bike Reyes nga mipadaog sa Angkols batok 3K's Trading, 73-72 sa kulbahinam nilang championship game sa LBA basketball tournament niadtong Sabado diha sa Lamac gym sa Consolacion, Cebu.

Gipangulohan ni Finals MVP Marwin Lacio ang maong kadaogan pinaagi sa iyang 14 puntos. Ang Angkols nakakuha sab og igong suporta gikan nilang Junrey Gonzaga ug Junard Ariesgado nga mitampo’g 11 ug 10 puntos matag usa.

Ang 3K's gipangulohan sab ni Jonnas Cayanong sa iyang 17 puntos ug 11 ka rebounds, gisundan ni Richard Madrid nga dunay 14 puntos. Si Kyor Ermac mihimo'g 11 puntos ug unom ka assists, samtang si Atty Monares miamot og 10 puntos alang sa 3K's.

Kontrolado sa Angkols ang unang-tulo ka kuwarter ug namintinar nila ang ilang double digits nga labaw. Apan ang 3K's mi-rally sa fourth quarter ug nilabaw pa'g dos puntos. Dali hinuon kaayong nakabawos ang Angkols aron makatabla, 69-all.

Sukad niadto, nagpuli-puli na'g labaw ang duha ka kampo. Katapusang nakalabaw ang 3K's sa nahabiling 15 segundos, 72-70 kortesiya sa lay-up ni Cayanong. Sa nahabiling singko segundos si Reyes mibuhi sa iyang marka bahalang tres nga nakahanaw sa bulawanong pangandoy sa 3K's.

Sa unang duwa, ang Never Give Up milubong sa Azitron, 88-75 aron mopahiluna sa ikatulong dapit ning maong torneyo nga gipasiugdahan ni LBA president Roy Ermac uban sa pagpaluyo ni Martin Colubio.

Si Darius Duron ang topscorer sa Never Give Up sa iyang 25 puntos, gisundan ni Vanz Abatayo nga dunay 21 puntos, Tanong Dayday 14 puntos ug Julieto Lacio 10 puntos.

Upat sab ka Azitron players miiskor og double digits pinangulohan ni Tibon nga miburak og 25 puntos. Si Joel Maglasang mihirit og 11 puntos, samtang silang Rico Sungahid ug Toto Repedro nagtampohay'g 10 puntos.