Doncic, Irving mi-aswat sa Mavs ngadto sa 3-0 nga labaw

CEBU, Philippines — Sila si Luka Doncic ug Kyrie Irving nagkumbinar og 66 puntos sa dihang gipayaka na sab sa Dallas Mavericks ang Minnesota Timberwolves, 116-107, ning higayona didto sa ilang korte aron pagkulit og 3-0 nga bentaha sa best-of-seven NBA Western Conference finals kagahapon didto sa American Airlines Center sa Dallas, Texas.

Mao kini ang labing dako nga daog sa Mavs human gipilde ang Wolves og kinatibuk-ang kuwatro puntos lamang sa nag-unang duha ka duwa serye didto sa Target Center sa Minneapolis.

Sa katapusang kuwarter diin ang duha ka mga koponan nagbinayloay sa labaw pito ka higayon, sila si Doncic ug Irving milusad og nagkayong 12-3 rally sa katapusang bahin sa duwa aron aswaton ang Mavs ngadto sa dalaygong kadaogan.

Puyde nang langkaton sa Mavs ang korona sa West kon ugaling ilang matiwasan ang Wolves sa Game 4 karong Miyerkules didto gihapon sa ilang tugkaran.

Sa kasaysayan sa NBA, wala pay team nga nakabangon  human malubong og 3-0 sa usa ka serye.

"We need one more," matud pa ni Doncic, nga mihipos og 33 puntos, pito ka rebounds, ug lima ka assists. "They have an amazing team, so nothing's done."

Si Irving mikadlit sab og 33 puntos, 14 puntos niini iyang gibubo sa katapusang kuwarter.

Si P.J. Washington miamot og 16 puntos, apil niini ang 3-pointer nga nakapa-abante sa Mavs, 107-104, sa hingpit sa pinal nga 3:38 sa aksiyon.

Si Anthony Edwards maoy nangu sa pilderong Wolves uban ang 26 puntos apan naposasan ngadto sa kuwatro puntos lamang sa ikaupat nga kuwarter.