Solidong laro pangako ni Ramos sa Gilas
MANILA, Philippines — Hindi nagdadalawang-isip si Fil-American Dwight Ramos sa tuwing tinatawag ito ng Samahang Basketbol ng Pilipinas (SBP) para maging bahagi ng Gilas Pilipinas pool.
Masaya ito sa tiwalang ibinibigay sa kanya ng coaching staff kaya’t nais niya itong suklian ng magandang laro sa oras na sumabak ang Pinoy squad sa FIBA World Cup Asian Qualifiers sa Philippine Arena sa Bocaue, Bulacan.
“I’m feeling pretty happy. The coaches chose me every time so far, so hopefully, I can keep showing them that I can help and hopefully get picked again,” wika ni Ramos.
Alam ni Ramos ang matinding laban na haharapin ng Gilas Pilipinas sa sixth window.
Unang makakaharap ng Pinoy cagers ang Lebanon — na tumalo sa kanila sa nakalipas na window — sa Pebrero 24 kasunod ang Jordan sa Pebrero 27.
Dumating na sa bansa ang mga miyembro ng pool na naglalaro sa Japan B.League.
Usap-usapan na sa social media na apat na players na nasa pool ang nakasisiguro na ng puwesto sa Final 12.
Una na sa listahan si Barangay Ginebra import Justin Brownlee na legal nang makalalaro suot ang Gilas Pilipinas jersey matapos maaprubahan ang kanyang naturalization.
Nasa listahan din sina reigning PBA MVP Scottie Thompson at Roger Pogoy kasama si Ramos.
Ngunit wala pang opisyal na listahan ang Gilas coaching staff dahil ihahayag ang Final 12 isang araw bago ang Philippine-Lebanon match.
- Latest