Magis Eagles, Baby Lancers mag-ilog solong liderato

CEBU, Philippines — Ang defending champion Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers parehong naglaraw nga angkonon ang solong liderato sa juniors division sa ilang panag-abot sa 2022 Cebu Schools Athletic Foundation, Inc. (CESAFI) basketball season karong adlawa didto sa Cebu Coliseum.

Lab-as pa gikan sa duha ka sagunson nga daog, ang Magis Eagles ug ang Baby Lancers mosuway pag-inat sa mainit nilang ratsada apan usa ka nila ang mahagba human sa ilang enkuwentro nga gikataka sa alas 5:15 sa hapon.

Giablihan sa Magis Eagles ang pagdepensa sa ilang titulo pinaagi sa pagpakaging sa University of Cebu Lapu-Lapu and Mandaue (UCLM) ug Cebu Eastern College (CEC) Dragons samtang ang Baby Lancers misikad sa ilang kampanya pinaagi sa sagunson nga daog batok sa University of San Carlos (USC) Baby Warriors ug University of San Jose-Recoletos (USJ-R) Baby Jaguars.

Sa collegiate level, ang Cebu Institute of Technology-University (CIT-U) Wildcats makigharong batok sa University of Southern Philippines Foundation (USPF) Panthers sa alas 6:45 sa gabii.

Managlahi ang nadangatan sa CIT-U ug USPF sa miagi nilang duwa.

Ang Wildcats mipakurat sa USC Warriors, 76-72, aron pakgangon ang duha ka sunod-sunod nilang malas samtang ang Panthers nakatilaw sa una nilang pilde human gidemolis sa UV Green Lancers, 68-86.

Sa laing bahin sa bugtong duwa niadtong Martes sa gabii, si Froilan Mangubat mipasiugda og mainit nga endgame rally aron ituboy ang USC Warriors ngadto sa 81-67 nga paglatigo sa USJ-R Jaguars.

Si Mangubat mibubo og 12 sa iyang 13 puntos sa katapusang kuwarter apil na niini ang duha ka hagpok nga 3-pointers nga nabuak sa likod sa Jaguars.

Igo lamang nakasikit ang Jaguars ngadto sa dos puntos, 56-58, gumikan kay ang Warriors milusad og nagkayong 23-9 run aron hingpit nga ibulsa ang daog uban ang 81-65 nga labaw human sa tres ni Mangubat sa pinal nga 45 segundos.

Gawas ni Mangubat, misidlak sab si Roosevelt Jelianggao bitbit ang 17 puntos ug walo ka rebounds samtang si VJ Baruc midugang og otso puntos sa dihang gitabla sa Warriors ang ilang record ngadto sa 2-2.

Sila si Carl Cabulao, Nino Panas, ug Matthew Carin parehong mitali og 10 puntos apan nangaminghoy silang tanan gumikan kay ang Jaguars nakatilaw sa ikaduha nilang sagunson nga pilde sud sa tulo ka duwa.