Amigos, Titans pabiling way pilde sa ABL

CEBU, Philippines — Ang Amigos ug Titans mipayaka sa tagsa-tagsa nila ka mga karibal aron pagpabiling way pilde sa 30-above division sa Amicis Basketball League (ABL) Season 2 didto sa Tayud barangay gym sa Consolacion.

Si Franie Suson mikimada og 21 puntos, tulo ka assists ug tulo ka steals samtang si Raniel Capangpangan mitampo og 17 puntos sa dihang gilampornas sa Amigos ang Gemini, 79-62, aron sa padayon niining pagdominar sa liderato bitbit ang perpektong 3-0 record.

Mitali si Leemark Cris Tayad og 23 puntos samtang sila si Abraham Tiongzon ug Henry Gestupa nagkumboya og 24 puntos apan nakawang ang ilang paningkamot gumikan kay ang Gemini nahagba sa ikaduang sunod-sunod nga higayon.

Sa laing bahin, sila si Jacob Baguio ug Larry Malagar nagkumbinar og 47 puntos aron pangulohan ang Titans ngadto sa 96-82 nga demolisyon sa YYBC.

Si Erwin Brigoli midonar og 19 puntos sa dihang ang Titans mireshistro sa ikaduha nilang sagunson nga daog.

Si Kobe Ponce dunay 29 puntos samtang si Gicole Iyong mi-iskor og 20 apan nangahoyhoy ang ilang abaga gumikan kay ang YYBC misukarap sa ikatulo nilang pilde.

Wala sab magpabitin ang Legendary ug Bornfree nga parehong miinat sa ilang baraha ngadto sa 2-1 human gipaluhod ang ilang mga kontra.

Si Brian Calzada mipabuhagay og 30 puntos uban ang unom ka rebounds ug duha ka steals sa dihang gibuntog sa Legendary ang 032 Kicks by Miller, 97-87, samtang sila si Michael Hoyohoy ug Kristoffer Dave Cabajes nakatigum og 48 puntos aron ituboy ang ang Bornfree ngadto sa 85-75 nga pagpakaging sa Miners.

Sa laing resulta, si Teodoro Tundag mikolekta og 30 puntos, unom ka assists ug duha ka steals sa dihang ang Persecutors miposte sa una nilang daog human gitumba ang RCBC Gamsi, 87-82.

Si Londi Malagar mibugha og 20 puntos ug si Elbert Malagar midugang og 14 puntos sa dihang gisanta sa Persecutors ang duha ka duwa nilang malas samtang gipatilaw ang RCBC sa una niining pilde sud sa tulo ka duwa.