Suganob, nontshinga magbinukbokay na krusyal nga rematch usa ka IBF title eliminator

CEBU, Philippines — Nahuman na gyud ang paghulat ni Regie "Filipino Phenom" Suganob kay ang garbo sa Bohol makigbugno na ni South African Svenathi "The Special One" Nontshinga sa usa ka mahinungdanong rematch karong adlawa (Sabado, Septiyembre 12).

Si Suganob (18-1, 7KOs) makigharong ni kanhi two-time world champion Nontshinga (14-2, 11KOs) sa usa ka 12 ka hugna nga International Boxing Federation (IBF) light flyweight title eliminator nga maoy main event sa "Kumong Bol-anon XXVI" sa PMI Bohol Boxing Promotions mga magsugod karong alas-6 sa gabii sa Bohol Wisdom School (BWS) Gymnasium sa dakbayan sa Tagbilaran.

Kon mobagting na ang kampana, ang nabantog nga reperi nga si Tony Weeks maoy mopatunga sa duha ka mga protagonista.

Ang 29-anyos nga si Suganob napildi pinaagi sa unanimous decision batok ni Nontshinga nga mao pay kampiyon sa una nilang engkwentro didto sa South Africa tulo ka tuig na ang milabay.

Niadtong tungora, si Suganob nangindahay pa sa balwarti sa iyang kaaway.

Ning higayona, si Suganob mokumbati atubangan sa mga paisano niyang Bol-anon.

"Mas grabi ako kadasig karon kay dinhi ang dula sa akoa hometown," matud pa ni Suganob atol sa usa ka  press conference kagahapong adlawa sa The Bellevue Pavilion sa isla sa Panglao.

"Ang ako ikapasalig nga modaog gyud ko ugma," dugang pa ni Suganob. "If makakita ko og opportunity nga tumbahon ang kontra ako buhaton."

Labaw sa pagpanimalos, si Suganob obligado nga modaog batok ni Nontshinga aron makaangkon siya og laing tsansa nga makaaway og balik alang sa kalibutanhong korona.

Si IBF President Daryl Peoples, nga maoy mosuperbisar sa makasaysayanong away sa ringside, mikompirma nga ang mananaog sa Suganob-Nontshinga II magabaton og katungod nga mogahit alang sa trono sa IBF light flyweight division, nga sa kasamtangan gikuptan ni Thanongsak Simsri (40-1, 35KOs) sa Thailand.

"Paningkamotan nako nga modaog kay usa na lang ka away makaduwa nako balik og world title fight," padayon pa ni Suganob.

Apan si Suganob angayan nga magmatngon kay si Nontshinga preparado kaayo alang sa usa ka dakong gubat sa pagpanulong niya sa teritoryo sa iyang kontra.

"I will show my skills to the maximum level tomorrow (today)," dason pa ni Nontshinga. "If ever opportunity comes, I will take him out."

Sa dili pa ang bugno nilang Suganob ug Nontshinga, tulo ka mga rehiyonal nga kampiyonato ang kumbatihan ning labing dako nga pasundayag sa boksing sa kasaysayan sa Bohol nga gipasiydahan sa  PMI Boxing ubos sa pagpangu ni Atty. Floriezyl Echavez Podot.

Si one-time world title challenger Reymart “Cebuano Assassin” Tagacanao (13-1, 11KOs) sa siyudad sa Carcar mosakbang batok ni Chinlin Kuwang (5-1, 2KOs) sa China alang sa IBF Asia junior bantamweight belt.

Ang way pilding si Leonard "The Dreamer" Pores III (11-0, 7KOs) sa Claveria, Misamis Oriental makig-atbang sa Indon nga si Andika Fredrikson “D' Golden Boy” Ha'e (21-3-2, 11KOs) alang sa IBF Pan Pacific flyweight title.

Ang laing way pildi nga batos sa PMI Stable nga si Datu Adam (7-0, 5KOs) sa Camiguin makigpinaksitay ni Oky Akbar (12-4, 5KOs) sa Indonesia alang sa korona sa IBF Asia junior featherweight category.