San Miguel Leg 5 3x3 champion

MANILA, Philippines — Nagsanib-puwersa sina Jeff Manday at Ken Bono para akayin ang San Miguel sa 21-12 panalo laban sa TNT Party at ang­kinin ang titulo sa Leg 5 ng PBA 3x3 Third Conference kahapon.

Ang unang leg crown ng Beermen ngayong conference ay nagkakahalaga ng P100,000.

Hindi na binitiwan ng San Miguel ang trangko matapos umiskor si Manday ng lay-up para basagin ang 7-7 pagtatabla, bago muling sinundan ito ng 9-2 run para ibaon ang TNT sa 16-9 may 3:31 minuto na lang sa laro.

Ang kabiguan ng TNT ang dumiskaril sa kanilang asam na maging unang koponan sa kasaysayan na nagwagi ng tatlong sunod na leg championship at nagkasya sa P50,000 premyo.

Napasakamay ng Cavitex ang ikatlong puwesto nang igupo ang Terrafirma, 21-14 para sa P30k.