Cebu city mo-host sa palarong pambansa boxing VisMin Cup

CEBU, Philippines — Kasado na ang tanan alang sa pag-host sa dakbayan sa Sugbo sa Palarong Pambansa Boxing VisMin Cup nga gikatakda karong Hulyo 12-15 diha sa Cebu City Sports Center.

Si Cebu City Sports Commission (CCSC) chairman John Pages maoy pormal nga mipahibawo ning labing dako nga boxing event dinhi sa Sugbo sud sa sa dul-an usa ka dekada atol sa usa ka press conference kagahapon sa City Hall.

"This has been in the works for several months now," matud pa ni Pages. "DepEd (Department of Education) offered this to us and we took this opportunity."

Sa kinatibuk-an, 80 ka mga batan-ong boksidor gikan sa walo ka teams lukop Visayas ug Mindanao ang mopakita og aksiyon ning upat ka adlaw nga torneyo nga libre sa publiko.   

"Most of the teams are already in place. Major cities in VisMin are going to join so this is going to be very exciting," dugang pa ni Pages.

Dunay lima ka weight classes sa duha ka age groups. Kini mao ang pinweight, light flyweight, flyweight, light bantamweight ug bantamweight alang sa Juniors division (15-16 anyos)  ug ang light flyweight, flyweight, bantamweight, lightweight, ug light welterweight alang sa Youth category (17-18 anyos).

Nanghinaut si Pages nga ilang magamit ang Boxing Cup isip hagdanan aron makab-ot ang tinguha sa dakbayan nga maka-host og usab sa Palarong Pambansa sa umaabot.

Ang labing una ug bugtong higayon nga ang dakbayan naka-host sa Palaro niadto pang 1994 kon 28 ka tuig na ang milabay.    

"This will be our stepping stone in our relationship with DepEd to show our interest to host whole Palaro in the future, which is really our ultimate goal," dason pa ni Pages.

Sa dili pa ang kumbati ibabaw sa ring, adunay duha ka adlaw nga National Boxing Refresher Course unya sa Hulyo 10-11. Pasiugdahan kini ni Ludy Ceriales, ang labing una ug bugtong Pinay nga 3-star referee/judge sa International Boxing Association (AIBA).