Russell ‘di nasisindak kay Magsayo
MANILA, Philippines — Hindi nasisindak si World Boxing Council (WBC) featherweight champion Gary Russell kay undefeated Pinoy fighter Mark Magsayo sa kanilang bakbakan sa Enero 22 (Enero 23) sa Borgata Hotel Casino and Spa sa Atlantic City, New Jersey.
Alam ni Russell na uhaw sa world title si Magsayo.
At nakikita nito ang determinasyon sa Pinoy pug para maagaw ang kanyang korona. Ngunit hindi ito mangyayari dahil handa ang reigning WBC champion na gawin ang lahat upang pigilan si Magsayo.
“I don’t have any concerns with Magsayo’s power. You very seldom see me have to come back on the scorecards. Magsayo had to come back in his last fight because he was losing on the cards. That shows some holes in his armor,” ani Russell.
Kabisado na ni Russell ang galaw ni Magsayo.
Napanood na nito ang laban ni Magsayo at nakita nito ang ilang kahinaan ng Pinoy boxer.
“I see him as a good even-handed puncher, maybe he leans a little more to the right hand. He has good punching power, but none of that matters if you can’t hit your target,” ani Russell.
Gayunpaman, walang balak magpakamante si Russell kaya’t pukpukan pa rin ang ginagawa nitong ensayo para masigurong handang-handa ito sa kanyang title defense.
Nakasentro ang atensiyon ni Russell sa Magsayo fight kaya’t wala muna itong binanggit para sa kanyang susunod na laban.
- Latest
