Didal milarga paingon sa Estados Unidos alang sa Olympic qualifying tournaments

CEBU, Philippines — Ang Sugboanang skateboard sensation nga si Margielyn Arda Didal nilarga na nasud paingon sa Estados Unidos aron mokumbati sa duha ka Tokyo Olympics qualifying tournaments.

Sugdan ang iyang unang misyon pinaagi sa Iowa Daw Tour nga gikatakda sa Mayo 7 hangtod 23 didto sa Des Moines.

Gikan didto, ang Asian ug Southeast Asian Games gold medalist molawig ngadto sa Rome, Italy aron mopakita'g aksiyon sa World Championship 2021 ug segurado siyang mo-qualify sa Tokyo karong Hulyo kon masulod sa top three.

“We wish Margie Didal well,” matud pa ni Philippine Sports Commission (PSC) chairman William Ramirez atol sa online media briefing niadtong Lunes.

Bisan pa og mapakyas siya pagtapos sa top three didto sa Rome, ang 21-anyos nga si Didal may kahigayonan gihapon nga madala sa Olympic. Kinahanglan iyang mamentinar o palambuon ang iyang ulahi nga kalibotanong ranggo sa No. 14 kay ang top 20 makaangkon og luna.

Tinguha ni Didal nga mokuyog ni gymnast Carlos Yulo, pole vaulter EJ Obiena, boxers Eumir Marcial, Irish Magno, Nesthy Petecio ug Carlo Paalam ug weightlifter Hidilyn Diaz sa Tokyo Olympics nga gikatakda sa Hulyo 23 hangtod Agosto 8.

Sa dili pa sa Des Moines, si Didal magbansay ug mobanat sa laing pocket tournaments didto sa California.