Didal pabiling malaumon

Sama sa ubang mga atleta, napakgang ang mga plano ug nahunong ang mga aktibidades ni Cebuana skateboard sensation Margielyn Arda Didal sa miaging tuig.

Tungod sa kalibutanong pandemiya, wala siya makapakita'g aksiyon sa pipila ka mga dagkong torneyo nga iya untang gikinahanglan aron pahayagan ang iyang tsansa nga makaangkon og luna sa Tokyo Olympics ning tuiga.

Apan bisan pa man sa mga hagit nga iyang nabagatan, si Didal nagpabiling malaumon nga makab-ot ang iyang damgo nga makarepresentar sa Pilipinas sa prestihiyosong torneyo nga mahitabo kausa lamang sud sa upat ka tuig.

Aron pahugtan ang iyang kampanya nga makasalmot sa Tokyo Games karong Hulyo, ang 21-anyos nga si Didal gikinahanglan nga mosalmot og daghang torneyo ug ingon man motapos sa top 3 sa World Championships.

Lain pang opsiyon sa taga-Barangay Lahug, Dakbayan sa Sugbo mao ang paghakot og puntos sa Olympic rankings aron makasud siya sa top 16 sa world rankings alang sa women's street event diin siya mokumbati. Segun sa lagda sa Olympics, 20 lamang ka qualifiers ang gitagana matag event. Laktod pagka sulti, duol gihapon sa luwag si Didal nga kasamtangang No. 14 sa world rankings.

Kon ugaling mabuligan gyud sa maayong palad ug masuklian ang pagpursige ug sakripisyo ni Didal, hayan nga duna na sa'y laing Sugbuanong atleta nga makaapil sa Olympics sunod ni Mary Joy Tabal nga mihimo og kasaysayan isip labing unang Pinay marathoner niadtong 2016 Rio Olympics didto sa Brazil.    Dili lamang kay kana ra. Si Didal lagmit mao pa'y makatunol sa labing unang gold medal sa Olympics nga dugay na kaayong gihandum sa tibuok nasudnong Pilipinhon.