Nuggets mipayaka sa Pacers didto sa Mexico

CEBU, Philippines — Si Nikola Jokic mikadlit og 19 puntos ug milangkat og 13 ka rebounds aron ibandera ang Denver Nuggets ngadto sa 114-102 nga pagbugha sa Indiana Pacers sa usa ka duwa sa NBA nga gipahigayon didto sa Arena CDMX sa siyudad sa Mexico kagahapong adlawa.

Hapit moposte og triple-double ang three-time MVP nga midugang og walo ka assists sa impresibo niyang salida.

Nanghugyaw sab sila si Cameron Johnson ug Jamal Murray nga nagkumboya'g 34 puntos, 10 ka rebounds ug siyam ka assists alang sa Nuggers, nga sa usa ka higayon milabaw og 27 puntos sa first half.

Migukod ang Pacers apan igo lamang sila nakasikit ngadto sa siyete puntos, 102-95, sa basket ni Jarace Walker sa nahibilin nga 7:27 sa duwa. Kini gumikan kay sila si Spencer Jones ug Aaron Gordon mipasilaob og balik sa opensiba sa Nuggets nga nahimo nilang yawi pagsilyo sa 12 puntos nga kadaogan.

Sila si Jones ug Grodon nagkumbinar og 23 puntos ug 11 ka rebounds alang sa Nuggets, nga nagkupot na karon og 5-3 win-loss rekord.

Si Pascal Siakam mipupo og 23 puntos, duha ka rebounds ug lima ka assists sa pildirong Pacers, nga natagak sa 3-7.