Garcia mas malakas sumuntok kay Pacquiao?

Talaga ba Ramirez?

MANILA, Philippines — Parehong naging sparring mate ni World Boxing Council (WBC) at World Boxing Organization (WBO) light welterweight champion Jose Ramirez sina Manny Pacquiao at Mikey Garcia.

At kung tatanungin kung sino ang mas malakas sumuntok, ikinukunsidera ni Ramirez na mas malakas bumanat si Garcia.

“They hit the same, but I think Mikey has probably a little heavier hand. Pacquiao just puts it together really well; he puts three or four punches,” ani Ramirez sa panayam ng Esnews.

Ilang beses din nakasama ni Ramirez si Pacquiao sa sparring dahil dati itong nagsasanay sa ilalim ni American Hall of Famer Freddie Roach.

Subalit kumalas ito kay Roach dahil marami itong hawak na mga boksingero kabilang na si Pacquiao.

Lumipat ito kay veteran trainer Roberto Garcia.

Pangarap ni Ramirez na makasagupa si Pacquiao sa kanyang mga susunod na laban.

Ngunit kailangan nitong umakyat ng weight division para makasagupa ang eight-division world champion.

Magandang pagkakataon ito upang malaman ni Ramirez ang tunay na bangis ng isang Manny Pacquiao sa ibabaw ng ring hindi lamang sa sparring session.

Hindi birong kalaban si Pacquiao na kasalukuyang nagmamay-ari ng World Boxing Association (WBA) welterweight title.

Malalim ang karanasan nito at armado ng mabagsik na kamao.