CVIRAA, PRISAA giuswag

CEBU, Philippines — Duha ka regional athletics meet sa Central Visayas nga gitakda unta karong bulana ang gipospon sa  kadagkoan sa Department of Education (DepEd) samtang padayon pa ang hulga sa novel corona virus dinhi sa nasud ug sa tibuok Asya.

Ang Central Visayas Regional Athletic Association (CVIRAA) Regional Meet nga ipahigayon dinhi sa Sugbo ug ang Private Schools Athletic Association (PRISAA) Regional Meet nga adto kumbatihon sa Dumaguete giuswag ug  wala pa'y tukmang petsa kon kanus-a kini ipahigayon.

Ang DepEd gusto maneguro nga malikayan nila nga makatampo sa pagkatap sa gikahadlokang sakit ang pagpahigayon og mga sporting events nga salmotan sa mga tinun-an sa nagkadaiyang dapit sa Region VII. Gawas sa mga sporting meets, dili usab idayon ang mga kalihukan sa girl scout, boy scout, field trips ug mga seminar sa mga maestra ilabi na kon adto kini sa gawas sa nasud.