'Brawl in Naga I' binukbukay na!

CEBU, Philippines — Ang kanhi WBO minimumweight champion  nga si  Victorio Saludar (19-4, 19KOs) makigbinukbukay na ni Michael Kinaadman (7-12-2, 5KOs) sa gikatakda nga 12 ka hugna nga kumbati alang sa Asian Boxing Federation (ABF) minimumweight title nga maoy main event sa 'Brawl in Naga I: Band of Brothers' karong kagabii didto sa Enan Chiong Activity Center sa Dakbayan sa Naga habagatang bahin sa Sugbo.

Sugdan ang kumbati sa alas-6 sa gabii.

Ang 29-anyos nga si Saludar magsugod pagpanday og balik sa iyang dalan pataas human siya malangkati sa iyang WBO title  ni Puerto Rican Wilfredo Mendez pinaagi sa unanimous decision niadtong Agosto 24 didto sa Puerto Rico Convention Center.

Mao kini ang ikatulong higayon nga magbangga sila si Saludar ug Kinaadman. Midaog siya pinaagi sa desisyon sa una nilang engkuwentro niadtong 2017 ug dayon gipakamang si Kinaadman sa ikapitong hugna sa ilang rematch niadtong Abril 3 sa miaging tuig didto sa Manolo Fortich municipal gymnasium sa Bukidnon.

Bisan pa man niini, ang garbo sa Cagayan de Oro City nagkanayon nga iya gihapong gilantaw si Kinaandam nga usa ka lig-on nga kontra nga dili angay kompiyansaan.

"Ready na kaayo ko but di lang mokompiyansa kay praktisado sab ako kontra," matud pa ni Saludar.

Ang mga manghod ni Saludar nga sila si Jakeson ug Vanjune mopakita sab og aksiyon ning kulbahinam nga promosyon nga gipasiugdahan ni Naris Singwangcha ug Championship Boxing Development of the Philippines inabagan sa Naga LGU ubos sa liderato ni Mayor Val Chiong isip tipik sa ilang Dagitab Festival.

Si Jakeson makigtigi ni Jake Amparo, samtang si Vanjune makigharong ni Justine Darap.

Sa usa ka espesyal nga pasundayag, si kanhi women's wold champion Casey 'The Lady Hawaiian Punch' Morton makigpinaksitay ni Saowaluk Nereengsri sa Thailand.

Sa uban pang mga away, mag-abot sila si April Abne batok Isagani Llaban; Bryan James Wild batok Melanio Torremocha, Jesriel Bonghanoy batok Marlon Alejandro, Marvin Loping batok  Leven Nemenso, John Paul Gabunillas batok Garry Rojo ug Ian Abne batok Marvin Campo.