SHS-AdC Magis Eagles kampiyon sa elementary basketball, mibira og luna sa 2027 CVIRAA Meet

Palarong Mandaue

CEBU, Philippines — Ang Sacred Heart School-Ateneo de Cebu (SHS-AdC) Magis Eagles milampornas sa Tabok Elementary School (TES), 60-35, aron paglugwa nga kampiyon sa elementary basketball sa Palarong Mandaue 2026 Division Meet nga giduwa niadtong Lunes, Septiyembre 7, didto sa Barangay Looc Gym sa dabayan sa Mandaue.

Ubos sa paggiya ni head coach Gabriel Catolico inabagan sa mga deputy coaches niyang sila si Jethro Balogbog ug Gio Laguyo, ang Magis Eagles miposte og perpektong 4-0 rekord dayon na ngadto sa pagsakmit sa gihandum nilang titulo.

Ang Ateneo Hearters miabli sa ilang kampanya ubam ang 70-14 nga demolisyon sa Cubacub ES.

Ila kining gisundan og 65-55 nga pagpayaka sa Paknaan ES sa quarterfinals sa wala pa sila mibira og luna sa final uban ang 36-25 nga pagpakaging sa Tabok ES.

Sa sangka alang sa gold medal, giusban og parot sa Magis Eagles ang Tabok ES, ning higayona sa mas dominante nga resulta aron langkaton ang korona.

Ang champion team, nga gilangkoban nilang Stefano Tequillo, Ludwig Trocio, Franco Servano, Schyler Famador, Daniel Gothong, Arkin Ayson, Theo Maddox Matheu, Addison Sarcauga, Asher Ding, Farrell Dy, Miguel Plaza ug Marcus Banaay, mosagubang sunod og mas lisud nga tahas kay sila man ang morepresenta sa Mandaue sa 2027 Central Visayas Regional Athletic Association (CVIRAA) Meet didto sa siyudad sa Danao.

"Getting the CVIRAA ticket was not just about offense and defense. It was all about the Ateneo Heart, the Ateneo way — playing for each other, trusting the process, and giving our best until the final buzzer," matud pa ni Catolico.

"But now, we need to restart. We need to learn again, work again, and prepare again for our next challenge. What we achieved yesterday is something to be proud of, but it is also a reminder that there is still a lot more to learn and improve. The journey continues," panapos pa ni Catolico.