Lancers abante sa finals; Magis Eagles buhi pa Duwa karon

CEBU, Philippines – Ang ARQ Builders-University of the Visayas (UV) Green Lancers nakabawi human malubong sa second half dayon na ngadto sa pagpatikalbong sa Cebu Landmasters-University of San Carlos (USC) Warriors, 78-70, aron pagmartsa ngadto sa seniors division finals sa 2019 Cebu Schools Athletic Foundation, Inc. (CESAFI) Partner’s Cup niadtong Lunes sa gabii didto sa Cebu Coliseum.

Alkansi og 13 puntos sa sayong bahin sa ikatulong kuwarter, ang Green Lancers mi-rally aron pag-ilog niini sa labaw, 54-52. Mi-abante pa hinoon og balik ang Warriors sa iskor nga 60-58 sa nahibiling singko minutos sa aksiyon apan gipabuthan sab dayon sila og 10-0 run sa Lancers hinungdan sa kalit niining pagbulhot ngadto sa 68-60 nga bentaha.

Ang Warriors nakasikit pa sa iskor nga 70-73 sa pinal nga 1:07 sa duwa apan mao na kadto ang katapusan nilang utong gumikan kay si Gileant Delator miposa og krusyal nga tres sa wala pa si Lassina Coulibally milansang og duha ka free throws aron pagsilyo sa kulbahinam nga daog sa Lancers.

Si Coulibally mibahug og 23 puntos, samtang sila si Jancork Cabahug ug Delator nagkumbinar og 27 puntos alang sa Lancers, nga makighasrong batok sa Southwestern University (SWU)-Phinma Cobras o dili ba sa Joemang’s Surplus-University of Cebu (UC) Webmasters sa best-of-three championship series sugod karong Biyernes, Agosto 2.

Sa juniors division, ang Cebu Landmasters/Sacred Heart School-Ateneo de Cebu (SHS-ADC) Magis Eagles naka-angkon pa og laing kinabuhi human gibihag ang kanhi way pildeng ARQ Builders-UV Baby Lancers, 69-57.

Sila si Mike Boniel, Reymark Narbasa ug LA Casinillo nagkumboya og 38 puntos alang sa Magis Eagles nga makigharong og usab sa Baby Lancers karong alas 5:30 sa hapon sa tinagakay nga duwa diin ang modaog mo-abante sa finals.