Spartans mibihag sa Pier Panthers
CEBU, Philippines – Midaog na sab ang Spartans dihang ilang gibihag ang Pier Panthers, 101-94 sa Liga sa Carmen niadtong Mayo 12 didto sa Carmen gym sa amihanang bahin sa Sugbo.
Ang best player of the game nga si Junjie Antigua maoy nangu sa lima ka Spartans players nga naka-double digits pinaagi sa iyang 23 puntos.
Naglisud ang Spartans sa nag-unang duha ka kuwarter resulta sa ilang pagkalubong sa halftime, 39-51. Bisan pa niini, wala mawad-i og paglaum ang Spartans ug padayong nga nakigsadurot hangtod nga midaog.
Sila si James Veloso, Red Capuno, Ivan Bejoc ug Yu Antigua dako sab og natampo sa kadaogan sa Spartans.
Lima sab ka players sa Pier Panthers ang miiskor og double figures pinangulohan ni Mark Zamodio nga mipaarak og 33 puntos. Ang laing upat mao sila si Felix Fernandez, Jovel Salazar, Denjie Caputolan ug Tyril Cabarles.
Sa laing aksiyon, ang Pirates mikawat sa ikatulo nilang daog pinaagi sa pagmasaker sa Crusaders, 88-75.
Gipangulohan ni Lyric Into ang daog nga mikabkab og 20 puntos, samtang si Wendell Senier mihakot og 14 puntos. Si Fetz Banzon mikubkob og 13 puntos sa Pirates, kansang duwa wala gyud molubad gikan sa pagsugod hangtod nahurot ang oras.
Si Abell Cando miantog og 21 puntos aron mangu sa napildeng Crusaders. Sila si Axle Pasaol ug Brylle Capangpangan miamot og 12 puntos matag usa, samtang si Karl Bejoc miambit og 10 puntos.
Giorganisar sa Thirdy's Jersey sa abag sa SK Federation ubos sa liderato ni Jether Lacno, ang liga gipadagan ni commissioner Arjie Lacno.
PUNTOS MATAG USA
Unang duwa:
PIRATES (88) – L. Into 20, Senier 14, Banzon 13, Villamor 7, Ca. Quingco 7, A. Into 6, Dorong 6, Cl. Quingco 4, Tuico 4, Peralta 3, Bardaje 2, Efe 2.
CRUSADERS (75) – Cando 21, Ax. Pasaol 12, Capangpangan 12, K. Bejoc 10, Euldan 7, J. Bejoc 6, Brigoli 4, Ab. Pasaolg 2, Capuno 1.
Ikaduhang duwa:
SPARTANS (101) – J. Antigua 23, Veloso 17, R. Capuno 12, Bejoc 11, Y. Antigua 11, Laping 8, HInlas 7, M. Capuno 6, Bontia 4, Maningo 2.
PIER (94) – Zamodio 33, Fernandez 15, Salazar 12, Caputolan 10, Cabarles 10, Ramas 6, Flores 4, Maningo 2, Abayon 2.
- Latest
