32 records nabura sa 2019 Palarong Pambansa
DAVAO CITY, Philippines — Kabuuang 32 records ang nasira sa tatlong sports events sa opisyal na pagtatapos ng 2019 Palarong Pambansa kahapon dito.
Sa naturang bilang ay 18 ang nabasag sa swimming pool habang 10 ang nabasura sa athletics at apat ang nasira sa archery competition ng taunang sports meet na nilahukan ng 17 rehiyon.
Noong 2018 Palarong Pambansa na idinaos sa Vigan, Ilocos Sur ay kabuuang 40 records ang nasira kung saan ang 19 dito ay naiposte sa swimming, 16 sa athletics at lima sa archery.
Iyon ang pinakamaraming marka na nabasag sa kasaysayan ng Palarong Pambansa.
Sa Antique noong 2017 ay 21 bagong records naman ang naiposte.
Limang bagong marka ang inilista ni National Capital Region swimmer Xiandi Chua ngayong 2019 sa kanyang mga nilangoy na 200-meter freestyle (2:09.05), 400m freestyle relay (4:05.19), 200m breaststroke (2:43.08), 200m individual medley (2:23.86) at 400m medley (4:32.49).
Kumolekta ang mga NCR bets ng 83 gold, 70 silver at 54 bronze medals para sa kanilang pang-15 sunod na overall championship matapos humakot ng 100 golds, 70 silvers at 50 bronzes sa Davao.
Samantala, nanatili sa No. 2 sa medal standings ang Region IV-A sa kanilang kinolektang 63 golds, 48 silvers at 70 bronzes kasunod ang Region VI.
- Latest
