Bacoor Strikers, Davao puro na sa semis

MANILA, Philippines — Nasilat din ng fifth seed Bacoor Strikers ang fourth seed Gen. Santos City Warriors, 90-80 upang pangunahan ang kanilang Southern Division best-of-three quarterfinal playoff sa 2019 MPBL Datu Cup noong Huwebes ng gabi sa Rizal Memorial College Gym sa Davao City.

Umiskor si Gab Banal ng 21 sa kabuuang 31 puntos sa first half habang umani ng 23 puntos si Mark Montuano para iangat ang isang paa ng Bacoor sa semifinal round.

Inaasahang tatangayin na ng tropa ni coach Jonathan Reyes ng Bacoor ang semis berth sa kanilang paghaharap sa Game 2 ng serye ngayong gabi sa teritoryo mismo ng GenSan Warriors sa Lagao Gym.

Sa iba pang laro, pinatunayan ng Davao Occidental Tigers ang kanilang top billing sa South Group matapos padapain ang 8th seed Cebu City Sharks, 82-67 para lumapit sa semis.

Naitala ni dating PBA player Mark Yee ang kanyang pang-14th double-double performance sa 20 puntos at 12 rebounds at 18 naman mula kay Bonbon Custodio na may kasamang tatlong rebounds, limang assists at dalawang steals para sa koponan ni coach Don Dulay.