Gullas Legacy Cup mosikad na
CEBU, Philippines – Nagpanikad na ang San Fernando Spartans nga depensaan ang ilang trono gumikan kay ang Samsam Gullas Cup 3.0. Cebu 1st District Legacy Cup Inter-Cities and Municipalities Under-20 Basketball Tournament mosikad na karong hapon didto sa San Fernando Sports Complex.
Laraw sa Spartans nga ablihan ang ilang kampanya pinaagi sa pagdaog sa dihang ilang sangkaon ang labing unang Governor's Cup champion Minglanilla Archangels sa main game sa alas-8 sa gabii.
Sa pasiunang aksiyon sa alas-5 sa hapon, ang Naga City Electrifiers makigtigi batok sa Sibonga Pillars, samtang ang Carcar City mobatok sa Talisay City Aquastars sa ikaduhang duwa sa alas-6:30 sa gabii.
Sa dili pa ang bugno sa korte, usa ka simpleng seremonyas sa pagbukas ang ipahigayon sa alas-2 sa hapon. Nag-una sa listahan sa mga pinasidunggang dinapit mao sila si Cebu First District Rep. Gerald Anthony 'Samsam' Gullas Jr. ug Talisay City Mayor Eduardo 'Eddiegul' R. Gullas.
Ning tuiga, si Samsam Gullas nagkanayon nga nakig-alayon sila sa Philippine Sports and Entertainment nga modala og high-tech video ug audio aron nindot ang pagpasalida sa tanang duwa sa Gullas Cup sa Facebook live.
"There will be commentators, in depth analysis and play by play commentary while the game is ongoing," matud pa ni Gullas.
Sa laing bahin, ang mga partisipanteng koponan magkumbati ubos sa single round robin format diin ang top 4 moabante sa crossover semifinals. Ang mga mananaog maoy mag-ilog sa titulo sa usa ka best-of-three series.
Ang makampiyon ning unom ka semanang torneyo nga kabahin sa pagpangandam sa unang distrito sa Sugbo sa umaabot nga Cebu Governor's Cup mobulsa og P80,000. Ang mopahiluna sa ikaduha ngadto sa ikaupat nga dapit modawat og P60,000, P40,000 ug P20,000.
- Latest
