Pocari binuhay ang tsansa sa Final 4
MANILA, Philippines — Buhay pa ang Pocari-Air Force nang palubugin ang Iriga-Navy sa pamamagitan ng straight-set win 25-23, 25-20, 25-20 para manatiling matibay ang tsansa sa Final Four race ng Premier Volleyball League Season 2 Open Conference kahapon sa The Arena sa San Juan City.
Nasungkit ng Lady Warriors ang ikaanim na panalo para saluhan ang Tacloban Fighting Warays sa No. 5 spot hawak ang magkatulad na 6-7 baraha.
Magkakatuwang sina dating MVP Myla Pablo at middle hitters Del Palomata at Jeanette Panaga para buhatin ang kanilang tropa sa panalo.
Naglista si Pablo ng 11 hits habang nagtarak naman si Palomata ng 10 attack sa matikas na opensa ng Lady Warriors.
Nanguna naman si Panaga sa net defense makaraang magtala ng apat na blocks kasama pa ang tatlong attacks.
Ngunit nakasalalay ang kinabukasan ng Lady Warriors at Fighting Warays sa magiging resulta ng laro ng Petro Gazz at Adamson University.
Kung mananalo ang Gazz Angels sa Lady Falcons ay awtomatiko nitong masusungkit ang huling tiket sa semis para samahan ang BanKo Perlas (10-3), Ateneo de Manila University (10-4) at Creamline (9-3).
- Latest