Pioneers milampurnas sa Generals sa E-Leagues

CEBU, Philippines — Si Jan Michael Auditor mitimbre og 18 puntos uban ang walo ka rebounds ug tulo ka assists sa dihang ang Sykes Pioneers mipayaka sa QBE Generals, 76-43 aron pagpabiling walay pilde sa Elite Classic sa Tanduay Athletics E-Leagues for Basketball Season 14 niadtong Domingo diha sa City Sports Club-Cebu gym.

Si Sherwin Anghay miamot og 12 puntos alang sa Pioneers nga kontrolado ang duwa gikan sa pagsugod aron pag-angkon og bahin sa liderato uban sa Accenture Sharks bitbit ang managsamang 3-0 nga baraha.

Miposte og 19 puntos si  Stuart Foot, apan wala kini nahimo gumikan kay ang Generals nasugamak sa ikaduha nilang sagunson nga pilde.

Sa laing duwa, ang Fusion BPO Services Inc. (kanhi Supportsave) Dragons nakaipsot batok sa Telstra-Teletech Boomerangs, 66-62  alang sa ikaduha nilang daog.

Bida sa Fusion mao si Niño Belande nga mikadlit og 26 puntos. Nakaangkon siya og igong suporta gikan nilang Janille Kristian Bantilan nga mihipos og 16 puntos ug Justine Marie Mier nga mipupo og 11 puntos.

Si Jasper Diaz miiskor og 17 puntos  alang sa Telstra nga nadakin-as sa ikaupat nilang sagunson nga kapildihan.

Sa EVO League, sila si Francis Mateo, Jaime Buena Jr. ug Mikkee Acedhore Caballero nagkumboyag 37 puntos alang sa Dyninno Jets nga miabli sa ilang kampanya pinaagi sa kulbahinam nga kadaogan batok sa Contact Solutions Flying Lemurs sa iskor nga 75-74, samtang si Peann Jazz Bartoces, David Saloria, Clark Sayson ug Fritz Malinao nakatigum og 58 puntos sa dihang gilabhan sa JP Morgan Chase & Co. Bankers ang SSI Research Now Warriors, 68-57. (BANAT NEWS)