Harold's hotel ma-no. 1

CEBU, Philippines – Dili na malalis ug klaro na kaayo ang Harold's Hotel maoy  mahimong no. 1 human sa elimination round sa FYA Season 21 Summer League 2018 basketball tournament.

Kini human ang Harold's Hotel ni Arnel Trinidad midaog na sab batok sa Soontit Construction ni John Soontit, 87-77 alang sa ilang 6-0 sa miaging gabii.

Lupig sa pinuntosay sa first period ang Harold's Hotel diin nabiyaan sila og sayes puntos human sa maong kuwarter, 20-26.

Ubos sa liderato ni Burnong Endrina, ang Harold's Hotel milusad og rally sa second period aron pag-usab sa dagan sa duwa. Si Endrina miiskor og 13 sa second quarter alang sa iyang 23 puntos sa Harold's Hotel.

Misikit ang Soontit, 53-57, apan mi-rally og balik ang Harold's Hotel  sa giya nilang Ryan Dacayana ug Edemar Jumantoc nga nagkum-boya'g 24 puntos. Si Niko Laborte miamot og 11 puntos.

Ang Soontit Construction nga nagbitbit og 2-3 record gipangulohan ni Mervin Manila nga miugkat og 18 puntos, sila si Soc Trocia ug Angelo Regudo mitampo'g 15 puntos matag usa, samtang si ballclub president Dexter Caballero miambit og 14 puntos.

Sa laing aksiyon, ang The Bros midaog na gyud sud sa upat nila ka duwa human gipilde ang mas lig-on nga Micaela, 89-83.

Sila lang si Raymart Gillangao ug Melfred Sampilo parehong mitikdol og 17 puntos aron pangulohan ang The Bros nga pabiling nangiwit gihapon sa standing sa ilang 1-3 record.

Si Ryan Villaver mao gihapon ang nangu sa Micaela pinaagi sa iyang 21 puntos, gisundan ni Noel Medalle nga mitali og 15 puntos ug Ranel Patalita nga adunay 14 puntos.

Bisan pa sa maong kapildihan, ang Micaela nagpabilin sa ikatulong dapit  sunod sa defending champion Yoyi's Pastries & Dessert.

Ang Micaela (4-2) nilang Noel Medalle ug Edgar Noquillo ug ang Yoyi's Pastries (4-1) ni Ahlmark Albaracin mag-ilog alang sa ikaduhang puwesto sa katapusan nilang duwa karong Huwebes.

Ang  liga nga nahimo pinaagi sa paningkamot sa FYA officers, gisuportahan ni Brgy. Capt. Boy Atillo.

PUNTOS MATAG USA

Unang duwa:

HAROLD'S Hotel (87) – Endrina 23, Dacayana 13, Jumantoc 11, Laborte 11, Billones 9 Ursal 7, B. Medalle 3, Parba 3, Arches 2.

SOONTIT Const. (77) – Manila 18, Trocio 15, Regudo 15, Caballero 14, Laud 6, Macachor 5, Laput 4.

Ikaduhang duwa:

THE BROS (89) – Gillangao 17, Sampilo 17, Sy 9, Baran 9, Arreglo 8, Z. Arreglo 7, Largo 4, Demol 4, Abella 2, Baran 2, Gillangao 2.

MICAELA (83) – Villaver 21, N. Medalle 15, Patalita 14, D. Tabares 8, Abay 8, Noquillo 7, Tabares 4, Arias 2.