Team World midaog sa Team U.S.A. sa Rising Stars Challenge

CEBU, Philippines - Trayenta’y sayes puntos ang naiskor ni Jamal Murray ug ang rookie sa New Orleans Pelicans nga si Buddy Hield midugang og 28 puntos aron  pangulohan ang Team World ngadto sa 150-141 nga kadaugan batok sa U.S.A. atol sa Rising Stars Challenge nga kabahin sa NBA All-Star weekend didto sa New Orleans.

Mipakita’g aksiyon sa maong duwa mao ang top rookies ug second-year pros sa liga.

Ang Canadian nga si Murray, pambato nga rookie sa Denver Nuggets, mipasud og siyam sa gipabuto niyang 14 ka tres dayon na ngadto sa pagsakmit sa MVP award. Samtang si Hield, lumad gikan sa Bahamas nahimo sab nga bida human milansang og 11 sa 22 niya ka itsada.

Miabag kanila ang Latvian nga si Kristaps Porzingis sa New York Knicks uban sa iyang 24 puntos.

Si Frank Kaminsky sa Charlotte Hornets mipabuhagay og 33 puntos sa U.S.A., samtang si Karl-Anthony Towns sa Minnesota Timberwolves mitampo og 24 puntos sa pilderong koponan. (BANAT NEWS)