J. Espina Agrivet kampiyon sa Dapdap, Compostela
CEBU, Philippines - Bisan pa sa daghan nga mga pagsuway, nakalabang gihapon sa lawod sa kalisdanan ang J. Espina Agrivet human gipilde ang Tag-ube, 93-78 sa finals aron pagsakmit sa titulo sa Dapdap Open Basketball Tournament niadtong Biyernes didto sa Barangay Dapdap gym sa lungsod sa Compostela, Cebu.
Si Jonher Espina maoy labing kuyaw nga nakaduwa alang sa J. Espina Agrivet kay bisan pa sa iyang kalinghod, nakapasud gihapon siya og walo ka 3-pointers.
Nakasurprisa kay siya usab ang nangu sa opensa pinaagi sa iyang 28 puntos.
Sa first period pa lang, si Espina nakapundo na og upat ka 3-points sa iyang 10 puntos paghuman sa maong kuwarter.
Biya unta og singko puntos sa first quarter, 23-28, apan ang J. Espina Agrivet sa giya ni coach Johnny Dieta, mi-rally inubanan ang solido nilang depensa aron ilogon ang labaw ug wala na kini molingi pa sukad niadto.
Misihag ang kadaugan sa J. Espina Agrivet pag-entra sa fourth quarter dihang naprotektahan ang double digits nilang labaw.
Nakapadasig sa duwa sa J. Espina Agrivet mao ang presensiya sa ilang team owner/manager nga si Jojie Espina. Laing miiskor og double figures alang sa J. Espina Agrivet mao si Rino Berame sa iyang 12 puntos ug silang Mark Abadia ug Moniva nga adunay 10 puntos matag usa.
Ang napildeng Tag-ube gipangulohan ni Jel Belandi pinaagi sa iyang 23 puntos, gisundan ni Khed Castro nga adunay 21 puntos.
Ang torneyo gipaluyohan ni Dapdap Brgy. Capt. Reynaldo S. Tanjay ug Giovannie T. Leones.
Puntos matag usa
J. ESPINA AGRIVET (93) – Espina 28, Berame 12, Abadia 10, Moniva 10, Ceniza 9, Aying 6, Cruz 6, Tagalog 4, Mpouma 2.
TAG-UBE (78) – Belandi 23, Castro 21, Villaber 16, Gomez 4, Bucatan 4, Tarona 3, R. Villaber 3, Rosal 3. (BANAT NEWS)
- Latest
