Trangia Sportswear kampiyon sa 8th FYA

CEBU, Philippines - Gitangtangan sa Trangia Sportswear (D&L Tailoring) og korona ang defending champion Angel Mary Pawnshop human sa ilang 110-98 nga kadaogan atol sa knockout finals kaniadtong Sabado sa gabii aron sakmiton ang titulo sa 8th F. Llamas Youth Association (FYA) basketball tournament didto sa sitio Manggahan covered court sa barangay Punta Princesa, ning dakbayan.

Sa sayo pa, naangkon sa Car Door Aircon ang ikatulong pwesto human sa ilang kadaogan batok sa Micaela (Simple Likes) sa iskor, 101-87.

Wala'y nakapugong kang ex-UC shooting guard Dandan Enriquez kinsa maoy nangu sa opensa sa Trangia ug kadaghanan niyang puntos gikan sa ilawom diin iyang gipahimuslan ang iyang gidak-on aron mukotlo og 24 puntos. Sila si Dexter Caballero ug Victor Lastomen miposa og 20 ug 19 puntos matag usa alang sa Trangia Sportswear samtang nagmangtas sab ang ilang team owner nga si Dodong Trangia kinsa miamot og 16 puntos ug may 14 puntos si Macmac Encarguez.

Si Enriquez maoy napiling MVP ug ang laing upat ka sakop sa Mythical five mao silang McLain Alkuino ug Ryan Villaver sa Angel Mary, Ranel Pataleta sa Car Door Aircon ug si Lastomen samtang si Caballero maoy naka-angkon sa Sportsmanship Award.

Si Alkuino, ang tema owner sa Angel Mary maoy nangu sa iyang team human siya moburak og 27 puntos bisan pa og didto na siya moduwa sa second quarter tungod kay uwahi siyang miabot. Midugang og 19 puntos si Villaver alang sa defending champion kinsa napilde sa ilang finals rematch.

Ang Trangia Sportswear kanunay gyud naglabaw sa maong duwa ug pinakado nilang labaw miabot ngadto sa 19 puntos, 70-51 sa three-pointer ni Caballero sa kataposang tres minutos sa duwa.

Sa sayo pa, si Pataleta maoy nangu sa Car Door Aircon sa iyang 28 puntos samtang si Noel Medalle maoy nangu sa Micaela sa iyang 19 puntos.

Ang mga officers sa FYA nga silang Baeng Medalle ug Toper Marata maoy mitunol sa mga tropeyo ngadto sa mga top performing teams.

Puntos matag usa:

Trangia Sportswear (110) –     Enriquez 24, Caballero 20, Lastomen 19, Trangia 16, Encarguez 14, Martinez 5, Parba 4, Malicay 3, Sarsaba 3, Barro 2.

Angel Mary Pawnshop (98) –    Alkuino 27, Villaver 19, Encarguez 13, Mendoza 12, Ramirez 9, Abella 7, Rara 6, Tabas 5, Sarentas 2. (BANAT NEWS)