Alaska miduol sa finals, labaw na'g 3-1 sa semis

CEBU, Philippines – Usa ka daog na lang ang kuwang sa Alaska Aces ug subli silang moabante sa finals sa PBA Philippine Cup dihang ilang gilampornas ang GlobalPort Batang Pier sa Game 4 sa ilang best-of-seven semifinals series kagabii didto sa Smart Araneta Coliseum.

Si Calvin Abueva nagmangtas human siya mirehistro og double-double 20 points ug 13 rebounds aron pangulohan ang Alaska nga labaw na og 3-1 sa serye.

Si RJ Jazul adunay 14 puntos, samtang ang veteran Cebuano shooter nga si Dondon Hontiveros mitampo og 10 puntos alang sa Aces nga may kahigayunan nga momartsa na sa finals kun mudaog pa sila sa Game 5 ugmang adlawa.

Human sa ilang 43-32 nga bintaha sa halftime, wa lung-i sa Alaska ang GlobalPort human nila gibanatan pagmaayo ang huyang nga depensa niini nga miresulta sa pagtubo sa ilang labaw ngadto sa 20 puntos, 82-62 paingun sa final period.

Ang sinaligang scorer sa Batang Pier nga si Terrence Romeo miiskor og 24 puntos, apan wala kaayo katabang ang iyang katimbang nga si Stanley Pringle nga igo lang mitampo og 16 puntos. (BANAT NEWS)