Sinulog bootfest adto na duwaon sa Don Bosco
CEBU, Philippines – Gumikan sa kadaghan sa mga partisipante, ang 2016 nga edisyon sa tinuig nga Sinulog Football Festival adto na duwaon sa Don Bosco Technology Center (DBTC) sa Barangay Punta Princesa, dakbayan sa Sugbo karong weekend imbes nga didto sa San Roque Parish field sa Subangdaku, dakbayan sa Mandaue.
Gawas sa mas nindot nga pasilidad, daghan sab nga duwa ang puwedeng duwaon sa susamang higayon didto sa DBTC.
Sa sayo pa, ang mga tigpasiugda sa maong torneyo nagkanayon nga midoble ang gidaghanon sa mga entrante karon kun itandi sa miaging tuig.
Aron ipanalisar ang tanan, magtagbo sila pag-usab alang sa katapusang panagtigum karong alas- 6 sa gabii diha sa Mang Inasal sa may Salinas drive sa Barangay Lahug.
Sa kinatibuk-an, 13 ka mga kategoriya ang kumbatihan sa labing unang kompetisyon sa football karong tuiga.
Sa men’s division, kini naglangkob sa men’s open, boys 13, 15, 18, 40-above ug inter-BPO.
Samtang sa women’s bracket, dunay ladies open, inter-BPO, girls 15 ug 18.
Duna sa’y mixed division alang sa under-7, 9 ug 11 age groups. (BANAT NEWS)
- Latest
