USC Warriors milatos sa NU Bulldogs
CEBU, Philippines – Duha ka managlahing kapalaran ang nasinati sa mga pambato sa Cebu Schools Athletic Foundation, Inc. dihang ang reigning CESAFI champion University of San Carlos (USC) Warriors mipilde sa kanhi UAAP champion National University (NU) Bulldogs, 73-72, samtang ang runner-up University of the Visayas (UV) Green Lancers napilde ngadto sa dili kaayo ilado nga Technological Institute of the Philippines (TIP) Engineers, 53-59 sa unang adlaw sa Elite Eight knockout stage sa 2015 PCCL National Collegiate Championship kagahapon didto sa Faith Academy gym sa Tanauan City, Batangas.
Ang Cameroonian nga si Shooster Olago, kinsa maoy unang langyaw’ng player nga nidaog sa MVP award sa CESAFI, ang Cebu’s premiere inter-school athletic league, mihimo’g game-high 22 puntos uban ang pito ka rebounds ug upat ka blocks aron pangulohan ang Warriors.
Siya sab ang nahimong bayani sa Warriors human niya mapasud ang iyang 19-foot-jumper sa nahabiling 1.7 segundo sa duwa nga nakahugno sa Bulldogs.
Biya og sayes puntos, 61-68 sa nahabiling 1:30 sa duwa, ang Warriors nakarekober pinaagi sa five-point blitz ni Olago aron mosikit ngadto sa dos puntos, 66-68 sa katapusang 49 segundos sa lahugay.
Nainat pagbalik ang labaw sa Bulldogs, 70-66 sa basket si Jayjay Alejandro, apan si Tagapan sa USC miposa og crucial triple gawas nga nakakubit siya og foul sa nahabiling sayes segundos, apan suwerte ang Warriors kay nakahimo’g double lane violation ang Bulldogs.
Sa final play, si Olago kalit nga mibuhi sa iyang long-jumper human gyud makadawat og inbound pass.
Ang Warriors makigsangka batok sa University of Sto. Tomas (UST) Growling Tigers karong adlawa didto sa San Juan Arena.
Sa laing bahin, sakit kaayo ang kapildihan sa UV Lancers gumikan kay sila ang midiktar sa halos tibuok duwa ug kalit lang silang mikolapso hinungdan sa sayo kaayo sila nga natagak.
Ang TIP Engineers sa laing bahin, makigsangka batok sa NCAA Season 91 runner-up San Beda College (SBC) Red Lions. (BANAT NEWS)
- Latest
