CEI ug MP Brokers nagtabla sa 3-0 sa BOC hoop

CEBU, Philippines – Gipatilaw sa CEI Brokers ni team owner Wiljun "Sugar" Camay sa labing una nilang pilde sa tulo ka duwa ang Kentkyle Cuisine pinaagi sa pagkulit og 92-82 nga kadaogan kaniadtong Huwebes sa gabii sa nagpadayon nga BOC Friendship Cup Christmas League didto sa barangay Tinago gym, ning dakbayan.

Sa laing bahin, wala makatulo og singot ang Taskforce Gilas kinsa midaog batok sa Chamber of Customs Brokers, Inc. (CCBI) Cebu Chapter pinaagi sa forfeiture.

Sa ilang ikaduhang tuig nga pagsalmot sa BOC Friendship Cup, mao pa kini ang unang higayon nga nakatabla sa liderato ang CEI kinsa mao karo'y dakung hulga sa MP Brokers nga mopukan kanila sa finals.

Kini tungod kay kumpleto og hinagiban ang CEI kinsa adunay maayong point guard, dunay shooters ug lima ka bigmen nga silang Tata Laborte, Philip Munez, Takloy Moral ug Bantulay brothers gikan sa Dumaguete nga silang Carlo ug Ronron.

Ang CEI Brokers kinsa nanginit og maayo sa fourth period, milabaw og labing menos 12 puntos, 79-67 sa kataposang 4:39 sa duwa pinaagi sa jumpshot ni ex-UC Webmasters guard Bennick Sealana kinsa maoy nangu sa CEI sa iyang 27 puntos.

Si Sealana didto na makasulod sa second quarter tungod kay nauwahi siya'g abot tungod sa traffic sa Mandaue.

Mibahug og 20 puntos si Kerker dela Cerna samtang midugang og 13 ug 10 puntos matag usa silang Jojo Solitario ug Munez.

Ang kanhi CIT power forward nga si Ramil Aninon maoy nangu sa Kentkyle sa  iyang 26 puntos ug midugang si  Jim Villa og 16 puntos apan wala makaamot silang Glenn Allierite ug Dodong Manlosa kinsa igo lang nagkumboya og sayis puntos.

Magtigi alang sa solong liderato karong Nobiyembre 5 ang CEI ug MP diin nanghinaut si Camay nga sa unang higayon, sila lang maoy unang makapilde sa MP sulod sa duha ka tuig nga wala'y pilde-pilde sa torneyo sa BOC.

Kung ila kining mahimo, dili lang kay segurado silang maoy makakuha sa solong liderato, hayan nga mohimo sila'g team record alang sa usa ka elimination round sweep kay dili na kaayo mga lig-on ang mosunod nilang mga kontra.

Puntos matag usa:

First Game:

CEI Brokers (92) – Sealana 27, Dela Cerna 20, Solitatio 13, Munez 10, Laborte 7, Fernandez 5, Garcia 4, R. Bantulay 3, W. Camay 1, Agpalo 1.

Kentkyle (82) – Aninon 26, Villa 16, Arevalo 9, Taborada 7, Dungog 5, Generalao 5, Allerite 4, Inopequez 4, Tan 4, Manlosa 2.

Second Game:

Taskforce Gilas daog batok sa CCBI pinaagi sa forfeiture. (BANAT NEWS)