Cignal, Sta. Elena babaklasin ang tanikala sa Spikers’ Turf
Laro Ngayon
(The Arena, San Juan City)
3 p.m. Sta. Elena vs Cignal
5 p.m. PLDT Home Ultera vs IEM
MANILA, Philippines – Maghihiwalay ng landas ngayon ang Cignal Tv Inc. HD Spikers at Sta. Elena habang mag-uunahan ang PLDT Home Ultera Fast Hitters at IEM Volley Masters sa unang panalo sa Spikers’ Turf Reinforced Conference sa The Arena sa San Juan City.
Parehong may 1-1 karta ang Cignal at Sta. Elena at ang mananalo sa larong magsisimula sa ganap na alas-3 ng hapon ay sosolohin ang pangatlong puwesto sa anim na koponang liga na inorganisa ng Sports Vision at handog ng PLDT Home Ultera.
Galing sa magkaibang resulta sa huling laro ang magkabilang koponan at inspiradong sasalang ang Sta. Elena matapos silatin ang PLDT, 25-22, 25-21, 14-25, 29-27, habang ang Cignal ay natalo sa Air Force Airmen, 22-25, 18-25, 25-20, 21-25.
Aasa si Sta. Elena coach Arnold Laniog na magpapatuloy ang magandang pagtutulungan ng mga ginagamit tulad ng nangyari sa huling laro na kung saan siyam na manlalaro ang pumuntos para makuha ang pangalawang dikit na panalo.
- Latest
