Prince Lee gilupig ang Kenyan sa Forwarder's Run

CEBU, Philippines – Gipakuratan ni Prince Joey Lee ang karibal niining Kenyan runner aron pagdominar sa men's 6-kilometer category sa Forwarder's Run kagahapon didto sa Cebu Business Park.

Gitapos ni Lee ang karera sud lamang sa 19 minutos ug 29.29 segundos. Iyang nawani si Kenyan Joseph Mururi nga nauwahi kaniya og usa ka segundo. Si Reymark Bautista maoy mipahiluna sa ikatulong puwesto sud sa oras nga 21:45.85.

Lain Kenyan hinoon nga si Abraham Kilimo maoy naghawod sa 12K run human mirehistro og oras nga 40 minutos ug 46.23 segundos. Layo kaayo ang gintang nila ni Paul James Zafico nga maoy nalandig sa ikaduhang dapit sa oras nga 42:05.70. Si Riez Enriquez maoy na-3rd sa oras nga 42:55.13.

Sa women's 12K, si Ruffa Sorongon maoy misakmit sa korona sa oras nga 50:34. Mikapyot sa nagsunod nga duha ka puwesto mao sila si Lovely Fe Andrin (56:11.97) ug Saralee Cuizon (59:35.08).

Ang igsoon ni Lovely Fe nga si Cherry Andrin maoy midaog sa women's 6K sa oras nga 26:32.02.

Sa 3K open,  sila si Michael Largo (7:22.07) ug Lizane Abella (9:32.31) maoy mipatigbabaw.

Sa espesyal nga dibisyon alang sa mga Forwarders, sila si Chad Casinillo (8:57.30) ug Hazel Ferolino (16:36.70) maoy nagmadaogon sa 3K, samtang sila si Bong Mendrozo (30:31.48) ug Chona Rubi (36:37.91) maoy nanghawod sa 6K. (BANAT NEWS)