Lancers vs. Warriors

CEBU, Philippines - Mag-ilog karon sa unang puwesto ang University of the Visayas Green Lancers  ug ang  University of San Carlos Warriors  sa gubat sa  walay pildeng mga koponan sa  15th   Cebu Schools Athletic Foundation, Inc. (CESAFI) karong gabii diha  sa Cebu Coliseum.

Pulos nagbitbit og 4-0 nga baraha, ang Green Lancers ug Warriors magsangka alang sa solong liderato sa maong giatngan nga duwa nga giisip sa kadaghanan nga finals preview.

Ang duwa gitakda sa alas-5:30 sa hapon.

Gipaabot sab sa maong sangka ang panagtakus sa mga imports nga silang Steve Cedrick Akomo sa Green Lancers ug Shooster Olago sa Warriors diin sila maoy motimon sa opensa sa tagsa-tagsa nila ka team.

Kun ang mga local players maoy hisgutan, halos parehas ang ilang abilidad, apan mas duna’y championship experience ug mas daghan ang beteranong players sa Lancers  itandi sa Warriors.

Sama pananglit  nilang Francisco Arong, Alwin Aguirre, Alfred Codilla ug Arvie Cabanero.

Ang Warriors makasalig sa ilang mga bigmen nga silang Charles Pepito ug Fil-Australian nga si William McAloney, kinsa maoy motimbang ni  Olago.  Makasalig sab sila sa ilang outside shooters nga silang Ian Tagapan, Nico Magat ug Victor Rabat.

Ang Warriors bag-o lang mikulit sa ilang ikaupat nga daog  niadtong Huwebes dihang ilang gilatos ang University of San Jose- Recoletos Jaguars, 90-75, samtang gikunis-kunis sa Lancers ang University of Southern Philippines Foundation Panthers, 97-56  niadtong Domingo.

Sa laing collegiate match,  ang 1-4 nga Cebu Institute of Technology University Wildcats makigtakus  sa 0-4 nga USPF Panthers sa alas-4 sa hapon.

Sa  juniors division, ang University of Cebu Junior Webmasters makigbatok sa  Don Bosco Technology Center Junior Greywolves sa ala-1 sa hapon, sundan dayon sa duwa tali sa Cebu Institute of Technology-University Wildkittens ug USJ-R Baby Jaguars sa alas-2:30 sa hapon.