CESAFI nabantog na

CEBU, Philippines - Si PBA commissioner Chito Narvasa naghisgut kabahin sa importansiya sa edukasyon, samtang si PBA star Junemar Fajardo, ang garbo sa mga Sugbuanon sa natad sa basketbol, midasig sa mga sumusulbong nga talento sa CESAFI  (Cebu Schools Athletic Foundation, Inc.) sa pagpaningkamot ug pagpraktis og maayo aron makab-ot nila ang ilang mga damgo.

Mao kini mga mahinungdanong mensahe nga gisabwag nilang Narvasa ug Fajardo atubangan sa gatosan ka mga atleta atol sa pormal nga pagbukas sa 15th CESAFI season kagahapon diha sa Cebu Coliseum.

Sa unang adlaw diin siya opisyal nga milingkod isip commissioner sa PBA, si Narvasa miingon nga usa ka prebilihiyo kaniya nga mahimong dinapit sa CESAFI nga alang kaniya usa ka mabulokon nga liga nga nahimo nang popular bisan gani didto sa Metro Manila.

Kun ugaling usa sa mga atleta gikan sa CESAFI makatabok sa PBA, makaduwa kini og maayo sud lamang sa 10 ka tuig mao nang iyang gihatagan og bili ang edukasyon kay makagarantiya kini nila og maayo ugma.

Alang ni Narvasa nga kun ang usa ka atleta mobubo og panahon sa edukasyon, mura sab siya og mibisbis alang sa maayong niyang ugma.

“Going to school provides you other opportunities,” matud pa ni Narvasa. “If you invest in school, it’s like you’re investing in your self for the rest of your life,”  dugang pa niya.

Sa iyang bahin, si Fajardo miawhag sa mga bag-ong henerasyon nga magduduwa sa CESAFI nga sa kanunay mag-ensayo kay mao kini ang magtuboy kanila ngadto sa kalampusan sa bisan unsang dalan sa kinabuhi nga ilang pagasubayon.

“Akong ikatambag nila nga praktis lang gyud og maayo. Kana bang dili lang moadto sa praktis aron mo-show-up kun dili magpraktis aron sila ma-improve. Bahala ginagmay basta dunay improvement kay tigumon ang tanang gamay modaku ra man na sa kadugayan,” matud pa sa higanteng basketbolista nga lumad gikan sa lungsod sa Pinamungajan.

Si Fajardo mitambong sa pagbukas sa CESAFI gumikan kay gitunolan man siya og Special Award agi’g pasalamat ug pagtamod sa iyang nakab-ot sa iyang karera nga seguradong mamahimong inspirasyon ug tamdanan dili lamang sa mga batos sa liga kun dili hasta sa uban pang mga atleta nga nangambisyon sab nga mosikat ug mohimo og pangan sa ilang kaugalingon ugma damlag. (BANAT NEWS)