Horford itinawid ang Hawks sa 19-dikit

ATLANTA -- Ang desisyon ng 76ers na pumukol sa three-point line ang halos pumigil sa winning streak ng Hawks.

Ngunit ang mga tirada ni Al Horford sa huling mga minuto ng laro ang nagpatuloy sa arangkada nila.

Umiskor si Horford ng 23 points para tulungan ang Atlanta na makabalik sa porma matapos pakawalan ang 21-point lead at talunin ang Philadelphia, 91-85.

Idiniretso ng Hawks ang kanilang franchise-record winning streak sa 19 laro.

Sinimulan ng Hawks ang kanilang ratsada matapos gibain ang Milwaukee Bucks noong Dec. 27 patungo sa kanilang best record.

Lumamang ang Hawks ng 21 points sa first half, ngunit nakabalik sa laro ang 76ers para agawin ang 83-81 bentahe mula sa slam dunk ni Nerlens Noel sa huling tatlong minuto ng laro.

Itinabla naman ni Horford ang labanan sa 83-83 kasunod ang tres ni Dennis Schroeder para sa 86-83 abante ng Atlanta sa huling 1:35 minuto.

Ang mintis ni K.J. McDaniels para sa Philadelphia ang nagresulta sa jumper ni Horford para sa five-point lead ng Atlanta tungo sa panalo.