Bisdaks mibanat dayun sa Milo Olympics

CEBU, Philippines – Init ang sugod sa Team Visayas dihang mipupo dayun sila og mga medalya sa unang adlaw sa 6th Milo Little Olympics National Finals niadtong miaging adlaw didto sa Marikina Sports Center.

Ang mga pambato sa athletics ang mihatag og daghang daog sa Bisdaks dihang mihatud sila og 11 ka gold medals, 11 ka silvers ug 11 ka bronzes.

Lakip sa mga mibida sa athletics mao si Ninolito Justiniane kinsa naka-double golds sa secondary boys 100m dash sud sa 11 segundos ug 200m run sa oras nga 22.4 seconds.

Si Kyle Dahili misutoy usab alang sa bulawan sa elementary boys 100m dash sa oras nga 13.2 seconds, samtang si Elrica Anne Guro midaog sa secondary girls 100m dash sa oras nga 12.7 seconds.

Gawas sa athletics, ang mga swimmers sa Team Visayas nakahimo usab og nindot nga performance sa ilang 6-2-8 gold-silver-bronze medals. Si Psalm Daniel Aquino misakiyo og tulo ka gold medals sa elementary boys class atol sa 50m butterfly, 50m freestyle ug 200m individual medley.

Sa gymnastics, ang cancer survivor nga si Daniela Dela Pisa mihatud og duha ka golds sa Team Visayas pinaagi sa rope and club apparatus ug rhythmic sportive gymnastics sa elementary class.

Midaog usab og gold medal alang sa Bisdaks si Artistic gymnast Eunie Sorono sa elementary WAG horse vault. Aduna usab siyay silver medal sa individual all-around ug floor exercises.

Samtang sa basketball event, ang University of San Carlos elementary boys mipukan sa Luzon, 80-27, samtang ang secondary team sa Team Visayas mipilde sa Mindanao, 81-72.

Nagmadaugon usab ang elementary ug secondary boys team sa Bisdaks sa football dihang ang Don Bosco Technology Center mikastigo sa Luzon, 8-1, sa wala pa sirohi ang Mindanao, 5-0 sa elementary division.

Ang Paref Springdale mirehistro usab og duha ka sunod-sunod nga daog sa secondary level batok sa Mindanao, 3-1, ug Luzon, 8-0. (BANAT NEWS)