Saint Scholatica's Academy Fun Run 2 gitakda

CEBU, Philippines - Ang Saint Scholastica's Academy sa Tabunok,  Talisay City mopahigayon og Fun Run 2 nga kabahin sa ilang Golden Jubilee sunod tuig.

Apan ang maong fun run nga bukas sa tanan, ipahigayon karong Hulyo 20 nga sugdan ug matapos diha sa  Saint Scholastica's Academy (SSA) grounds.

Sa press conference kagahapon diha sa buhatan ni Bise Mayor Romeo Villarante, si Sister Maria Rosario Obinian, ang directress sa Saint Scholastica's Academy, Padre Adriano Ocariza, alumni president ug Pepito Lim, Saint Scholastica's Academy Batch 1987 mihatag og mga kasayoran kabahin sa maong fun run.

Si Lim, kinsa maoy organizer sa kalihukan nagkanayon nga ang maong fun run usa  ka fund-raising event ug gibahin kini sa duha ka kategoriya -- 4.3K ug 10.1K.

Si Padre Ocariza sa iyang bahin, miingon nga ang kuwarta nga matigom sa maong kalihukan ilang gamiton sa paghatag og mga "apostolic needs" sa mga kabus nga pamilya.

Ganting salapi ang madawat sa top five finishers sa matag kategoriya.

Ang kampiyon sa 10.1K mobulsa'g P3,000, ang second placer makadawat og P2,000, samtang ang third placer makaangkon og P1,000. Ang fourth ug fifth  placers gantihan og P500 matag usa.

Sa 4.3K, ang top three finishers makadawat og P1,000, P500 ug P300. Ang fourth ug fifth placers mobulsa'g P200 matag usa.

Makadawat sab og award ang "best dress up runner",  "youngest" ug "oldest" runner.

Ang  registration nagkantidad og P300 libre na ang singlets ug P50 alang sa mga high school students, apan walay singlets.

Mahimong magparehistro sa buhatan sa bise mayor, city administrator, Saint Scholastica's Academy (SSA) ug Nita's Bakery atubangan sa VECO.  Ang deadline sa registration kutob lang karong Hulyo 10.

Ang lumba manukad sa SSA agi sa flyover Tabunok paingon sa barangay San Isidro, Cebu South Coastal Road liko sa  tuo subay ngadto sa island atubangan sa city hall, dayon paliko sa wala paingon sa Sitio Uldog, Poblacion ug balik  paingon na ngadto sa SSA grounds. (BANAT NEWS)