Lancers 3-peat champion

CEBU, Philippines - Nakampiyon na sab sa  ikatulong higayon ang Lancers Basketball  Club sa Coca Cola PBA Youngstars Cebu Leg.

 Kini human sila midaog pinaagi sa paglubong sa Cebu Warriors sa finals sa iskor nga 81-59 sa miaging adlaw didto sa  Capitol Parish Church Gym.

 Ang three-year Coke PBA veterans nga silang Orlan Wamar ug Joshua Flores maoy nangu sa opensa sa Lancers ug  nakakuha sab sila og maayong suporta gikan sa ilang bench.

 Silang Wamar ug Flores nagkumboya'g 13 puntos sa first period ug padayon silang nagpabuhagay og daghang puntos sa second quarter aron molabaw og 36-22 atol sa halftime.

 Tungod sa ilang hugot nga depensa, napugngan sa Lancers  ang  Warriors ngadto lang sa siyete puntos.

 Misamot kaburot ang labaw ngadto sa 18 puntos, 58-40 human sa third period.   Silang John Galinato ug Neville Morales mikulit og 13 puntos matag usa alang sa Warriors.

 Sa laing duwa, ang Cebu Elite midaog batok sa Dragons Ballclub, 69-56.

 Isip kampiyon, ang Lancers makigsangka batok sa champions gikan sa Bacolod ug Iloilo alang sa Visayas Regional Finals nga gikatakda  sa Mayo 10-11 didto sa Iloilo City.

 Sa laing bahin,  ang  CVIRAA mipilde sa USC, 69-60 aron maghari sa team 19 pocket tournament sa CYBL.

 Silang Janjan Jaboneta ug Lucky Ecarma maoy nagpasiugda sa rally sa CVIRAA aron molabaw sa halftime, 33-23.

 Si Jaboneta miiskor og 17 puntos, samtang si Ecarma adunay 15 puntos.

 Ang USC gipangulohan ni Juneau Antigua sa iyang 22 puntos.

PUNTOS MATAG USA

Unang duwa:

 Lancers (81) – Flores 24, Wamar 18, Maglasang 9, Cahigas 8, Alforque 8, Canoy 7, Zenarosa 4, Igot 2, Gonzaga 1.

 Cebu Warriors (59) – Morales 13, Galinato 13, Ting 12, Antigua 12, Balaga 4,Pakanna 3, Chavez 2.

Ikaduhang duwa:

 CVIRAA (69) – Jaboneta 17, Ecarma 15, Mantua 8, Laguyo 7, Galinato 7, Igna 5, Navarro 5, Ong 2, Ortega 2, King 1.

 USC (60) – Ju. Antigua 22, Sable 13, Villagracia 12, Mendez 7, Malazarte 6, Je. Antigua 4, Aying 2, Maravilla 1, Ting 1.